Մարդու իրավունքների պաշտպան Արման Թաթոյանն այսօր՝ մայիսի 25–ին, ընդունել է Եվրոպայի խորհրդի ծրագրերի գլխավոր տնօրինության գլխավոր տնօրեն Վերենա Թեյլորին եւ Երեւանում Եվրոպայի խորհրդի գրասենյակի նորանշանակ ղեկավար Մարտինա Շմիդտին: Այս մասին Politik.am-ը տեղեկանում է ՄԻՊ–ի ֆեյսբուքյան էջից։
Արման Թաթոյանը շնորհավորել է Մարտինա Շմիդտին առաքելության ստանձնման կապակցությամբ՝ բարձր գնահատելով Եվրոպայի խորհրդի եւ մասնավորապես, Երեւանում Եվրոպայի խորհրդի գրասենյակի հետ բարձր համագործակցությունը։
Հանդիպման ընթացքում Մարդու իրավունքների պաշտպանը ներկայացրել է Սյունիքում եւ Գեղարքունիքում իր փաստահավաք աշխատանքների արդյունքները ՀՀ սահմանային բնակիչների իրավունքների վերաբերյալ:
Հատուկ ընդգծվել է, որ ադրբեջանական իշխանություններն արհեստական ձգձգում, քաղաքականացնում են գերիների ազատ արձակման ու վերադարձի գործընթացը:
Մարդու իրավունքների պաշտպանն անդրադարձել է նաեւ 2020 թվականի սեպտեմբեր-նոյեմբեր ամիսներին տեղի ունեցած պատերազմի հետեւանքով Արցախից տեղահանված անձանց խնդիրներին եւ Մարդու իրավունքների պաշտպանի փաստահավաք աշխատանքների հիման վրա կազմված համապատասխան արտահերթ զեկույցին։
Հանդիպման ընթացքում քննարկվել են նաեւ կանանց իրավունքների պաշտպանությանն առնչվող հարցեր, այդ թվում՝ Մարդու իրավունքների պաշտպանի կողմից կարծրատիպերի կոտրմանն ուղղված իրազեկման արշավները, ընտանիքում բռնության դեպքերի լուսաբանման առանձնահատկությունների վերաբերյալ լրագրողների կարողությունների զարգացման առնչվող հարցեր եւ այլն։
Արման Թաթոյանը շեշտել է, որ նոր կորոնավիրուսի (COVID-19) դեմ պայքարի հիմքով հայտարարված արտակարգ դրության սահմանափակումների ընթացքում Պաշտպանի աշխատակազմում ստեղծվել է աշխատանքային խումբ, որը զբաղվել է կանանց, երեխաների իրավունքների պաշտպանության ու ընտանիքում բռնության կանխարգելմանը վերաբերող հարցերով, քանի որ հատկապես այդ ժամանակահատվածում դիմումների ուսումնասիրությունը ցույց է տվել, որ մեծացել է կանանց, երեխաների եւ տարեցների նկատմամբ բռնության ռիսկը՝ պայմանավորված ամբողջ աշխարհում վարակի կանխարգելման առանձնահատուկ ցուցումներով (մեկուսացում, աշխատանքի չգնալ, որպես կողմնակի հետեւանք՝ սոցիալական բնույթի հարցեր եւ այլն):
Հանդիպման ժամանակ կողմերը պայմանավորվածություն են ձեռք բերել ընդլայնել համագործակցության շրջանակը։
