Իրանի խորհրդարանի նախագահ Մոհամմադ Բաղեր Ղալիբաֆը հայտարարել է, որ Թեհրանը մտադիր չէ անձնատուր լինել կամ դադարեցնել իր գործունեությունը ԱՄՆ-ի ճնշման տակ՝ ընդգծելով երկրի ռազմական հնարավորությունները և կայուն զսպում ապահովելու կարողությունը, հայտնում է Mehr գործակալությունը։
Ելույթ ունենալով երեքշաբթի օրը իրանա-իրաքյան պատերազմի վետերանների պատվին կազմակերպված արարողության ժամանակ՝ Ղալիբաֆը հայտարարել է, որ Իրանի ռազմական կարողությունները հասել են այնպիսի մակարդակի, որը թույլ է տալիս երկրին, նրա խոսքով, առանց սահմանափակումների հրթիռային հարվածներ հասցնել ցանկացած ընտրված թիրախի։
Նա նաև նշել է, որ Իրանը չի ընկրկի համալիր ճնշման ազդեցության տակ, որը ներառում է տնտեսական, ռազմական և դիվանագիտական միջոցառումներ։
«Մենք երբեք կապիտուլյացիայի չենք ենթարկվի և չենք փակի երկիրը։ Մենք ուժով կպատասխանենք, ինչպես արել ենք մինչ այժմ, և բոլոր ուղղություններով կզրկենք հակառակորդին հնարավորություններից»,- ասել է Իրանի խորհրդարանի խոսնակը։
Անմիջապես դիմելով ԱՄՆ նախագահ Դոնալդ Թրամփին՝ Ղալիբաֆը հայտարարել է, որ ամերիկացի առաջնորդը բախվում է «պատմական քաղաքակրթության» ու Իրանի ազգային և կրոնական դիմադրության հետ։
«Նա պետք է իմանա, որ չի կարող իր ուժը պարտադրել իրանական ժողովրդին և զինված ուժերին», - ասել է Ղալիբաֆը։
Նրա խոսքով՝ Իրանն ունի «կայուն զսպման» ներուժ և ունակ է դիմակայել իր հակառակորդներին։
Միևնույն ժամանակ, Ղալիբաֆն ընդգծել է, որ Թեհրանը դիվանագիտությունը չի դիտարկում որպես դիմակայությունից հրաժարում։
«Թող հակառակորդն իմանա. բանակցությունները նույնպես պայքարի դաշտ են»,- հայտարարել է նա։
Խոսնակի խոսքով՝ դիվանագիտությունը նշանակում է ոչ թե կապիտուլյացիա, այլ «ռազմի դաշտում ունեցած ուժը վերածել քաղաքական ձեռքբերման»։
Այս հայտարարությունը հնչել է Իրանի և ԱՄՆ-ի միջև պահպանվող լարվածության և հակամարտության հնարավոր դադարեցման շուրջ դիվանագիտական շփումների ֆոնին։
Ավելի վաղ հայտնի էր դարձել նաև, որ Թեհրանը միջնորդների միջոցով Վաշինգտոնին բանակցությունների վերսկսման առաջարկ է փոխանցել՝ այն կապելով ամերիկյան ճնշումների վերացման և Հորմուզի նեղուցի վերաբերյալ պայմանների հետ։
