ԱՄՆ նախագահ Դոնալդ Թրամփի հետ վիճաբանությունից հետո՝ Tesla-ի և SpaceX-ի ղեկավար Իլոն Մասկը չի պատասխանել ԱՄՆ Ներկայացուցիչների պալատի խոսնակ Մայք Ջոնսոնի հաղորդագրություններին, իսկ հետո փոխել է իր հեռախոսահամարը։ Այս մասին Ջոնսոնը պատմել է New York Post թերթին տված հարցազրույցում։
Ջոնսոնը հայտարարել է, որ փորձել է հաշտեցնել Թրամփին և Մասկին։ Ըստ նրա՝ նա փորձել է կապ հաստատել գործարարի հետ վիճաբանությունից հետո։ Բացի այդ, ԱՄՆ նախագահը «նույնպես դեմ չէր» դրան։
«Ես նրան (Իլոն Մասկին) երկար հաղորդագրություն ուղարկեցի և հետո նրա հեռախոսահամարը փոխվեց։ Ես հասկացա, որ այդ հաղորդագրությունն ուղարկում էի մեկ այլ տեղ և նա այդպես էլ չկարդաց այն», — ասել է Ջոնսոնը։
Սակայն նա հավելել է, որ այնուամենայնիվ հաջողվել է կապ հաստատել Մասկի հետ՝ երրորդ անձի միջոցով։
Մինչ այդ հաղորդվել է, որ ԱՄՆ փոխնախագահ Ջեյ Դի Վենսը և Սպիտակ տան աշխատակազմի ղեկավար Սյուզան Ուայլսը զանգահարել են Մասկին և կոչ արել նրան դադարեցնել Դոնալդ Թրամփի հետ վեճը։
Թրամփի և Մասկի միջև հրապարակային վեճը տեղի է ունեցել հունիսի 5-ին։ Գործարարը քննադատել է քաղաքացիների համար հարկային արտոնությունների մասին օրինագիծը։ Ի պատասխան՝ Թրամփն առաջարկել է դադարեցնել Մասկի նախագծերին սուբսիդիաների և պայմանագրերի հատկացումը՝ բյուջետային միջոցները խնայելու նպատակով։
Դրանից հետո X սոցիալական ցանցում նախկին ընկերների միջև վիճաբանություն է սկսվել, որի ընթացքում Մասկը հայտարարել է, որ առանց իր աջակցության Թրամփը չէր կարող հաղթել ԱՄՆ նախագահի ընտրություններում։
