Դոհայի վրա վերջերս տեղի ունեցած Իսրայելի հարձակումը մտահոգիչ սրացում է, որը, հնարավոր է, նոր և վտանգավոր գլուխ բացի այս ավերիչ հակամարտության մեջ՝ լուրջ սպառնալիք հանդիսանալով տարածաշրջանային խաղաղության և կայունության համար։ Այս մասին ՄԱԿ-ի Անվտանգության խորհրդի նիստում հայտարարել է ՄԱԿ-ի գլխավոր քարտուղարի քաղաքական և խաղաղաշինության հարցերով տեղակալ Ռոզմարի ԴիԿառլոն։
«Ցանկացած երկրի, այդ թվում՝ Կատարի՝ որպես խաղաղության հաստատման և հակամարտությունների կարգավորման գործում արժեքավոր գործընկերոջ ինքնիշխանությունն ու տարածքային ամբողջականությունը պետք է հարգվեն», - նշել է ԴիԿառլոն։
Նա կոչ է արել բոլոր կողմերին զսպվածություն ցուցաբերել և վերահաստատել է բանակցային և միջնորդական ուղիները պահպանելու անհրաժեշտությունը՝ կանխելու հետագա տառապանքները Գազայում և ավելի լայն տարածաշրջանում։
Սեպտեմբերի 11-ի նիստից առաջ Անվտանգության խորհուրդը մամուլի հայտարարություն է տարածել՝ դատապարտելով Դոհայում տեղի ունեցած հարվածները և խորը ափսոսանք հայտնելով քաղաքացիական անձանց կյանքի կորստի համար։
Հայտարարության համաձայն՝ վերահաստատվել է աջակցությունը Կատարի ինքնիշխանությանը և տարածքային ամբողջականությանը։ Փաստաթղթում ընդգծել է Եգիպտոսի և Միացյալ Նահանգների հետ միասին Կատարի կարևոր դերն «ավերիչ պատերազմը դադարեցնելու միջնորդական ջանքերում»։ Նաև բոլոր կողմերին կոչ է արվել օգտվել խաղաղության հասնելու համար առկա դիվանագիտական հնարավորություններից։
Կատարի վարչապետ, արտաքին գործերի նախարար շեյխ Մուհամմադ բին Աբդ ալ-Ռահման ալ-Թանին ողջունել է ՄԱԿ-ի Անվտանգության խորհրդի հայտարարությունը, որը դատապարտում է Իսրայելի հարձակումը Դոհայի վրա։ Նախարարը հայտարարել է, որ հարձակումը տեղի է ունեցել դպրոցներով, դեսպանատներով և բնակելի տներով լի թաղամասում՝ ընդգծելով, որ հարձակումը խաթարում է միջազգային կարգը և սպառնում տարածաշրջանի անվտանգությանն ու կայունությանը։
Սեպտեմբերի 9-ին Իսրայելը հարված է հասցրել Կատարի մայրաքաղաքին՝ թիրախավորելով ՀԱՄԱՍ-ի ղեկավարությանը։ ՀԱՄԱՍ-ը հայտարարել է, որ իսրայելական հարձակման ժամանակ սպանվել է շարժման հինգ անդամ։
Հարձակումը դատապարտման է արժանացել ինչպես տարածաշրջանի, այնպես էլ այլ երկրների կողմից։
