«Ազգային միավորում» կուսակցության խորհրդարանական խմբակցության ղեկավար Մարին լը Պենը, որին Ֆրանսիայում դատապարտել են ազատազրկման եւ զրկել թեկնածությունն առաջիկա նախագահական ընտրություններում առաջադրելու հնարավորությունից, մտադիր է դիմել Մարդու իրավունքների եվրոպական դատարան (ՄԻԵԴ) եւ Ֆրանսիայի Սահմանադրական դատարան՝ դատավճռի հետ կապված։
«Ես կդիմեմ Մարդու իրավունքների եվրոպական դատարան եւ Ֆրանսիայի Սահմանադրական դատարան։ Ես կօգտվեմ իրավական պաշտպանության բոլոր հնարավոր միջոցներից։ Ես չեմ նահանջի»,- ասել է քաղաքական գործիչը Le Parisien թերթի հարցազրույցում։
