Ռուսաստանի ԱԳ նախարարությունը սեպտեմբերի 11-ին պահանջել է Լեհաստանից մտածել սահմանի փակման «հետևանքների մասին և վերանայել որոշումը». Վարշավան ռուս-բելառուսական «Արևմուտք-2025» զորավարժությունների կապակցությամբ սեպտեմբերի 12-ի կեսգիշերից փակել է Բելառուսի հետ սահմանի բոլոր անցակետերը։ Այդ մասին գրում է Deutsche Welle-ի ռուսական ծառայությունը:
Այդ սահմանափակումները «վնաս կհասցնեն Լեհաստանի միջազգային գործընկերներին» և «կհարվածեն հենց հանրապետության բիզնեսին», հայտարարել է ՌԴ արտաքին գործերի նախարարության պաշտոնական ներկայացուցիչ Մարիա Զախարովան։ Նրա պնդմամբ՝ Վարշավան «անտեսել է Մոսկվայի և Մինսկի բարի կամքի ժեստը», որոնք զորավարժությունների մի մասը տեղափոխել են սահմանից ավելի հեռու և կրճատել զորքերի ու տեխնիկայի թվաքանակը։ Ռուսաստանի ԱԳՆ-ում այն կարծիքին են, որ սահմանի փակումը վկայում է «Եվրոպայում լարվածությունը սրելու՝ Լեհաստանի ուղեգծի մասին»։
Ռուս-բելառուսական «Արևմուտք-2025» համատեղ զորավարժությունները տեղի են ունենում սեպտեմբերի 12-ից 16-ը։ Նրանց ծրագիրը, ի թիվս այլ բաների, ներառում է միջուկային զենքի և «Օրեշնիկ» նոր հրթիռային համակարգի կիրառման վարժանքներ։ Լեհաստանի վարչապետ Դոնալդ Տուսկը զորավարժությունները որակել է «ագրեսիվ՝ իր ռազմական դոկտրինայի առումով» և ընդգծել, որ դրանք մոդելավորում են Սուվալկի միջանցքի գրավումը, որը Բալթյան երկրները կապում է ՆԱՏՕ-ի մյուս պետությունների հետ։
Իրադրությունը բարդացել է լույս սեպտեմբերի 10-ի գիշերը տեղի ունեցած միջադեպից հետո, երբ ռուսական անօդաչուների զանգվածային գրոհը Ուկրաինայի վրա ընդգրկեց Լեհաստանի օդային տարածությունը։ Երկիր է մտել առնվազն 19 անօդաչու թռչող սարք, որոնցից չորսը խոցվել է։ ԱԹՍ-ներից հինգն ընկել է Լյուբլինի վոյևոդությունում, մեկը՝ վնասել Վիրիկի գյուղի մի բնակելի շենք։ Կալանման համար գործի են դրվել ՆԱՏՕ-ի կործանիչները՝ առաջին անգամ Ուկրաինայում պատերազմի սկսվելուց ի վեր։
