ՌԴ ԱԳ նախարար Սերգեյ Լավրովը Եվրահանձնաժողովի նախագահ Ուրսուլա ֆոն դեր Լայենին անվանել է «Ֆյուրեր Ուրսուլա», ով մոբիլիզացնում է Եվրոպան վերառազմականացման համար, փոխանցում է ՏԱՍՍ-ը։
«Իրավիճակը փոխվեց, երբ ուկրաինական ռեժիմը սահմանադրության մեջ ներառեց ՆԱՏՕ-ին անդամակցությունը՝ միաժամանակ պահպանելով ազգային փոքրամասնությունների երաշխիքները։ Նրանք հայտարարել են, որ ՆԱՏՕ-ն և ԵՄ-ն Ուկրաինայի ապագան են։ Երբ նրանք առաջին անգամ սկսեցին խոսել այս մասին, Եվրամիությունը դեռ պահպանում էր տնտեսական միավորման որոշակի տեսք, բայց այժմ այն ամբողջովին կորցրել է այդ հատկանիշը», ասել է ՌԴ նախարարը ամերիկացի բլոգերներ Մարիո Նաուֆալի, Լարի Ջոնսոնի և Էնդրյու Նապոլիտանոյի հետ հարցազրույցում։
«Ֆյուրեր Ուրսուլան» մոբիլիզացնում է բոլորին Եվրոպայի վերառազմականացման համար»,- հայտարարել է Լավրովը:
Ինչպես նշել է ՌԴ ԱԳՆ ղեկավարը, խոսքը «ինչ-որ անհավանական գումարի» մասին է։ «Շատերը կարծում են, որ սա հնարք է՝ բնակչության ուշադրությունը շեղելու տասնյակ և հարյուր միլիարդավոր եվրոներից, որոնք ծախսվել են առանց պատշաճ աուդիտի COVID-19 համաճարակի դեմ պայքարի և Ուկրաինային օգնություն տրամադրելու ժամանակ։ Այդ ամենը ներկայումս քննարկվում է»,- ընդգծել է Լավրովը։
