ՀՀ ազգային ժողովի պետաիրավական հարցերի մշտական հանձնաժողովի նախագահ Վլադիմիր Վարդանյանը ադրբեջանցիների կողմից Արցախն աշխարհին կապող միակ ճանապարհը փակելը համարում է էթնիկ զտման քաղաքականության, անգամ ցեղասպանության փորձ:
Վարդանյանը նման տեսակետ հայտնեց ԱԺ արտահերթ նիստում իր ելույթում՝ անդրադառնալով ադրբեջանցի «բնապահպանների» կողմից Լաչինի միջանցքը փակելուն:
Վարդանյանը համարում է, որ առնվազն, եթե միջազգային իրավունքը չի մահացել, ապա կլինիկական մահ է տանում:
«Մտավախություն ունեմ, որ այն, ինչ տեղի է ունենում այսօր՝ կապված այդ «բնապահպանների», «պսևդոբնապահպանների» հետ, ոչ այլ ինչ է, քան շատ լավ պլանավորած էթնիկ զտման քաղաքականության փորձ»,-ասաց պատգամավորը:
Նա մեջբերում արեց Ցեղասպանության հանցագործությունը կանխելու և պատժելու մասին կոնվենցիայից՝ ցեղասպանություն նշանակում է որևէ խմբի համար կյանքի այնպիսի պայմանների միտումնավոր ստեղծումը, որոնք ուղղված են նրա լրիվ կամ մասնակի ֆիզիկական ոչնչացմանը: «Մենք դրա հետ ենք բախվում»,-նշեց Վարդանյանը:
Պատգամավորը վստահ է, որ հայ ժողովուրդը միասնականորեն կարող է հաջողությունների հասնել:
