Եվրոպական դիվանագիտության ղեկավար Կայա Կալասը ԵՄ երկրներին առաջարկել է Ուկրաինային տրամադրել 5 մլրդ եվրո արժողությամբ 2 մլն խոշոր տրամաչափի հրետանային զինամթերք։ Նրա խոսքով՝ արկերի տեղափոխումը կարող է իրականացվել մինչեւ 2025թ. ավարտը։ «Կարծում եմ, որ մենք կարող ենք դա անել»,- ասել է Կալասը ՝ ավելացնելով, որ ԵՄ երկրները կարող են «փող ներդնել կամ զինամթերք տալ»: Մինչ այդ Կալասն առաջարկել էր ստեղծել «Ցանկացողների կոալիցիա» ԵՄ ներսում՝ ռազմական օգնություն տրամադրելու համար Ուկրաինային։ Այս մոտեցումն ընտրվել է Հունգարիայի եւ Սլովակիայի վետոն շրջանցելու համար, որոնք հրաժարվում են աջակցել Կիեւին, գրել է Politico-ն։ Պլանը ենթադրում է 20-40 մլրդ եվրոյի հատկացում Կիեւին 2025թ.։ Առաջարկում ասվում է, որ երկրները պետք է ներդրում կատարեն իրենց «տնտեսական կշռին» համապատասխան։ Սակայն մարտի 17-ին կայացած հանդիպման ժամանակ ԵՄ ԱԳ նախարարները չեն կարողացել համաձայնության գալ նախաձեռնության շուրջ: Դեմ են արտահայտվել Իտալիան, Իսպանիան եւ Ֆրանսիան։ «Սա երկարաժամկետ ծրագիր է, որին երկրները պատրաստ չեն համաձայնել այս պահին»,- բացատրել է Կալասը: Նրա խոսքով՝ այժմ Բրյուսելը մտադիր է կենտրոնանալ Կիեւի հրատապ կարիքների բավարարման վրա։ ԵՄ դիվանագիտության ղեկավարի նոր նախաձեռնությունը կքննարկվի ԵՄ առաջնորդների գագաթաժողովում, որը տեղի կունենա հինգշաբթի՝ մարտի 20-ին։ Մինչ այդ ՌԴ նախագահ Վլադիմիր Պուտինը Ուկրաինային ռազմական օգնության ամբողջական դադարեցումն անվանել էր խաղաղ կարգավորման «առանցքային պայման»։ Այդ մասին նա, մասնավորապես, հայտնել է մարտի 18-ին ԱՄՆ նախագահ Դոնալդ Թրամփի հետ հեռախոսազրույցում։ Սակայն ԵՄ-ը հրաժարվել է դադարեցնել Կիեւին ռազմական աջակցությունը։ Ռուսաստանն իրականում չի պատրաստվում որեւէ զիջման գնալ եւ ցանկանում է, որ Ուկրաինան նվազեցնի իր պաշտպանությունը, բացատրել է Կալասը: Մեծ Բրիտանիան եւ Գերմանիան նույնպես մտադիր չեն դադարեցնել ռազմական օգնությունը Կիեւին։
