Այսօր կառավարության հերթական նիստին ՀՀ վարչապետ Նիկոլ Փաշինյանը կրթության ոլորտի բարեփոխումներին անդրադարձավ և նշեց, որ այն անկյունաքարային է: «Կրթությունը նրա մասին է, որ մենք մարդուն հնարավորություն տանք, ինքը ստիպված չլինի 75 հազար դրամով աշխատի: Եթե մարդը ամիսը 75 հազար դրամ աշխատավարձով աշխատում է, դա նշանակում է, որ մարդը նորմալ կրթություն չի ստացել, դա կարող է լինել մասնագիտական կրթության մասին»,- ասաց նա:
Վարչապետը նկատեց, որ երբեմն ասում են, թե մարդը բարձրագույն կրթության երկու դիպլոմով չի կարողանում աշխատանք գտնել, և դա ևս խոսում է կրթության մասին:
ՀՀ էկոնոմիկայի նախարար Վահան Քերոբյանը հայտնեց, որ օգոստոս ամսվա տվյալներով՝ Հայաստանի միջին աշխատավարձը կազմել է 250 հազար դրամից ավելի, այսինքն՝ նվազագույն աշխատավարձից 3,5 անգամ ավելի:
«IT ոլորտի աշխատողների միջին աշխատավարձերը միլիոն 100 հազար դրամից ավելի են, այսինքն՝ նվազագույն աշխատավարձից 15 անգամ ավելի բարձր, և դա համադրելի է նույնիսկ Եվրոպայի, ԱՄՆ-ի այդ ոլորտի աշխատակիցների աշխատավարձերին»,-ասաց նա:
