Էլեկտրաէներգիայի մատակարարումն ապրիլի 29-ի առավոտվա դրությամբ վերականգնվել է գրեթե ամբողջ Իսպանիայում, Պորտուգալիայի մեծ մասում և Ֆրանսիայում:
Reuters գործակալությունը, վկայակոչելով իսպանական Red Electrica օպերատորին, նշում է, որ գրեթե ամբողջ երկրում էլեկտրականությունը վերականգնվել է։
Իսպանիայի վարչապետ Պեդրո Սանչեսը հայտարարել է, որ քննիչները կվերլուծեն անջատումների բոլոր հնարավոր պատճառները, և հասարակայնությանը կոչ է արել չշահարկել այս թեման։
Ըստ պորտուգալական Lusa պարբերականի՝ E-Redes օպերատոր ընկերությունը հայտնել է, որ էլեկտրամատակարարման ծառայությունները վերականգնվել են։ Երկրի երկաթուղային հաղորդակցությունն աստիճանաբար վերսկսվում է։
Պորտուգալիայի վարչապետ Լուիշ Մոնտենեգրուն հայտնել է, որ երկրի բնակչության 80%-ին կրկին հասանելի է էլեկտրականությունը։
Ֆրանսիական ԶԼՄ-ների տվյալներով՝ էլեկտրամատակարարումն ամբողջությամբ վերականգնվել է Ֆրանսիայի այն շրջաններում, որտեղ նախորդ օրը տեղի է ունեցել անջատում։
Ապրիլի 28-ին էլեկտրամատակարարման մասշտաբային խափանումներ են տեղի ունեցել Իսպանիայի տարածքի զգալի մասում, ինչպես նաև Պորտուգալիայում և Ֆրանսիայի որոշ շրջաններում։
Էլեկտրամատակարարման հետ կապված խնդիրները խափանումներ են առաջացրել հասարակական տրանսպորտի, լուսացույցների, բանկոմատների, բջջային կապի և ինտերնետի աշխատանքում։
