Իրանի զինված ուժերը երկրի գերագույն առաջնորդ այաթոլլա Ալի Խամենեիի հրամանով բերվել են բարձր պատրաստվածության մակարդակի՝ Թեհրանի հասցեին ԱՄՆ նախագահ Դոնալդ Թրամփի սպառնալիքների լույսի ներքո։
Այս մասին նշվում է Reuters-ի հոդվածում՝ հղում անելով իրանցի պաշտոնյային:
Reuters-ը հիշեցնում է, որ Ալի Խամենեին մերժել է իրանական միջուկային ծրագրի շուրջ ուղիղ բանակցություններ վարելու՝ Թրամփի առաջարկը։
Սակայն, ըստ գործակալության աղբյուրի, Թեհրանը կողմ է անուղղակի բանակցություններին, որոնցում Օմանը պետք է հանդես գա որպես միջնորդ։
Մարտի 7-ին Թրամփը հայտարարեց, որ ուղերձ է հղել Խամենեին՝ առաջարկելով բանակցություններ վարել միջուկային ծրագրի շուրջ։ Թեհրանը հրաժարվեց Վաշինգտոնի հետ ուղիղ երկխոսությունից, սակայն թույլ տվեց միջնորդների միջոցով շարունակել խորհրդակցությունները։
Մարտի 30-ին ամերիկացի առաջնորդը հայտարարել էր, որ երկու շաբաթից հավելյալ մաքսատուրքեր կսահմանի Իրանի նկատմամբ, եթե միջուկային ծրագրի շուրջ բանակցություններն արդյունք չտան։ Նա նաև սպառնացել է Իսլամական Հանրապետությանը աննախադեպ ռմբակոծություններով, եթե գործարքն ամբողջությամբ հրաժարվի:
Ի պատասխան՝ Խամենեին ասաց, որ չի հավատում, որ ԱՄՆ ռազմական միջամտությունը հավանական է, սակայն զգուշացրեց, որ Իրանում անկարգություններ հրահրելու Վաշինգտոնի ցանկացած փորձ վճռականորեն կհակադարձվի:
