Իրանի խորհրդարանի խոսնակ Մոհամմադ Բաղեր Ղալիբաֆը երեքշաբթի իր թուրք գործընկեր Նուման Քուրթուլմուշի հետ հանդիպման ժամանակ ընդգծել է, որ երկու ազդեցիկ մահմեդական երկրները կարող են համատեղ երաշխավորել տարածաշրջանային կայունությունը, հաղորդում է Mehr գործակալությունը։ Երկու խորհրդարանների խոսնակները հանդիպել են Ժնևում՝ երեքշաբթի՝ խորհրդարանների խոսնակների վեցերորդ համաշխարհային համաժողովի շրջանակում։ Հանդիպմանը Քուրթուլմուշը և Ղալիբաֆն ընդգծել են Իրանի և Թուրքիայի միջև տարբեր ոլորտներում հարաբերությունների զարգացման կարևորությունը։
Նշելով, որ տարածաշրջանում իրավիճակը բարդ է, և գլոբալ ու տարածաշրջանային մակարդակներում զարգացումները կարող են նոր մարտահրավերների հանդիպել, Ղալիբաֆը շեշտել է, որ տարածաշրջանում անկայունության արմատները ամերիկյան ուղղակի միջամտության մեջ են։
«Իրանն ու Թուրքիան ունեն ամուր երկկողմ և տարածաշրջանային հարաբերություններ, որոնք կարող են ազդեցություն ունենալ տարածաշրջանում պայմանների բարելավման վրա»,- նշել է նա։
Իրանի խորհրդարանի նախագահը երախտագիտություն է հայտնել Թուրքիայում «կառավարության, կուսակցությունների, հասարակական կարծիքի և խորհրդարանի կողմից Իրանի դեմ սիոնիստական ռեժիմի և Միացյալ Նահանգների 12-օրյա ագրեսիայի ընթացքում» զբաղեցրած դիրքորոշման համար։
Նա զգուշացրել է նաև, որ «սիոնիստները տարածաշրջանում վարում են իրենց էքսպանսիոնիստական քաղաքականությունը»։
Իր հերթին, Քուրթուլմուշը նշել է, որ երկու երկրների միջև համագործակցության մակարդակն ընդլայնվում է՝ հավելելով, որ օրակարգում կլինի երկկողմ առևտրի ծավալը 50 միլիարդ դոլարով ավելացնելու նպատակը։
