«Ինտելեկտուալ Հայաստան» կուսակցության քաղաքական խորհուրդը հայտարարություն է տարածել, որը ներկայացնում ենք ստորև.
«Քանի դեռ ՌԴ 102֊րդ ռազմաբազայի ղեկավարի միջնորդությամբ Սյունիքում դադարել են ռազմական գործողությունները
Քանի դեռ արդիական է ադրբեջանական զինված ուժերի հետագա առաջխաղացման սպառնալիքը
Քանի դեռ անդառնալի ու ճակատագրական չեն ՀՀ տարածքային կորուստները
Որևէ ողջամիտ ակնկալիք չունենալով ՀՀ իշխանություններից
«Ինտելեկտուալ Հայաստան» կուսակցությունը կոչ է անում
- Դադարեցնել ներկուսակցական ժողովները, միջկուսակցական ամբիցիաները
- Պատասխանատվություն ստանձնել ստեղծված օրհասական վիճակում
- Հրատապ վերագործարկել ՀՀ և Արցախի նախկին նախագահների հանդիպման ձևաչափը` կոնկրետ ու անհապաղ գործողությունների օրակարգով
- Բոլոր քաղաքական ու հանրային ուժերի համատեղ ջանքերով ձևավորել Հայաստանի պետականության նվաստացումը կանխող շարժում։
- Ժամ առաջ ձևավորել իշխանափոխության գործընթաց»։
Հիշեցնենք, որ նոյեմբերի 16-ին, ժամը 13։00-ի սահմաններում, ադրբեջանական ԶՈՒ ստորաբաժանումները հերթական սադրանքն են նախաձեռնել ՀՀ արևելյան սահմանագոտու ուղղությամբ՝ գնդակոծության ենթարկելով հայկական դիրքերը։ Ժամը 17։00-ի դրությամբ իրադրությունը ՀՀ արևելյան սահմանագոտում, ուր այսօր հարձակում էին նախաձեռնել Ադրբեջանի ԶՈՒ ստորաբաժանումները, շարունակում է ծայրահեղ լարված մնալ։
Մարտերի ինտենսիվությունը չի թուլացել։ Հակառակորդը շարունակում է կիրառել հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։ Հայկական կողմի պատասխան գործողությունների արդյունքում հակառակորդն ունի անձնակազմի մեծաթիվ կորուստներ, զրահատեխնիկայի շուրջ մեկ տասնյակ միավոր ոչնչացվել կամ շարքից դուրս է բերվել։ Հայկական կողմը նույնպես կորուստներ ունի։ Տվյալները ճշտվում են։ ՀՀ ԶՈՒ 12 զինծառայող՝ 7 պայմանագրային և 5 ժամկետային գերեվարվել են։
