Դեկտեմբերի 10-ին Հայաստանի Ազգային ժողովում ավարտվեց գաղտնի քվեարկությունը, որից հետո տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական խորհրդարանական հանձնաժողովի նախագահի պաշտոնը ստանձնեց իշխող «Իմ քայլը» դաշինքի պատգամավոր Վահե Գալստյանը: Նրա թեկնածությանը կողմ քվեարկեց 77 խորհրդարանական, դեմ` 4 պատգամավոր:
Մեկ այլ քվեարկության արդյունքում պատգամավորները հաստատեցին Դավիթ Նահապետյանի թեկնածությունը Կենտրոնական բանկի խորհրդի անդամի պաշտոնում: Նրա թեկնածությանը կողմ քվեարկեց 81, դեմ` 1 պատգամավոր:
Այնուամենայնիվ, չնայած մեծամասնությունը կողմ հանդես եկավ Կարեն Առուստամյանի թեկնածությանը Հաշվեքննիչ պալատի անդամի պաշտոնում, այդ ձայները բավարար չէին նոր պաշտոնը ստանալու համար: Նրա թեկնածությանը կողմ քվեարկեց 79 խորհրդարանական` չնայած պահանջվում էր առնվազն 80 ձայն:
