Ամերիկայի Միացյալ Նահանգների նախագահ Դոնալդ Թրամփը գործադիր հրաման է ստորագրել Եմենի հութիների «Անսար Ալլահ» խմբավորումը որպես օտարերկրյա ահաբեկչական կազմակերպություն ճանաչելու մասին։
Հրամանագրի տեքստում նշվում է, որ 2023 թվականից ի վեր հութիները, Իրանի Իսլամական հեղափոխության պահապանների կորպուսի (ԻՀՊԿ) աջակցությամբ, տասնյակ անգամ «գնդակոծել են ԱՄՆ ռազմածովային ուժերի ռազմանավերի ուղղությամբ», իսկ «2014-2015 թթ. իրականացրել բազմաթիվ հարձակումներ քաղաքացիական ենթակառուցվածքների վրա, ներառյալ բազմաթիվ հարձակումներ Սաուդյան Արաբիայի քաղաքացիական օդանավակայանների վրա, 2022 թվականի հունվարին Արաբական Միացյալ Էմիրությունների վրա մահացու հարձակումներ ու 2023 թվականի հոկտեմբերից ի վեր Իսրայելի ուղղությամբ արձակել ավելի քան 300 արկ»:
«Հութիների գործողությունները սպառնում են Մերձավոր Արևելքում ամերիկացի խաղաղ բնակիչների և անձնակազմի անվտանգությանը, մեր ամենամոտ տարածաշրջանային գործընկերների անվտանգությանը և համաշխարհային ծովային առևտրի կայունությանը»,- ասվում է փաստաթղթում։
Հրամանի համաձայն՝ ԱՄՆ պետքարտուղարը պետք է նախագահին Ազգային անվտանգության խորհրդի միջոցով ներկայացնի զեկույց «Անսար Ալլահն» օտարերկրյա ահաբեկչական կազմակերպությունների ցուցակում ընդգրկելու մասին, իսկ 15 օրվա ընթացքում՝ այն ներկայացնելուց հետո ձեռնարկել բոլոր գործողությունները՝ կազմակերպությունը ահաբեկչական կազմակերպություն ճանաչելու համար։
Բացի այդ, ԱՄՆ Միջազգային զարգացման գործակալությունը (USAID) և Պետդեպարտամենտը կխզեն կապը Եմենի ցանկացած կազմակերպության հետ, որը վճարումներ է կատարել հութիներին կամ հակազդել է խմբավորման դեմ պայքարի միջազգային ջանքերին:
