Լոս Անջելեսի շրջանի անտառային հրդեհները վնասել կամ ոչնչացրել են մոտ 350 միլիոն դոլարի հանրային ենթակառուցվածք, հաղորդում է The Los Angeles Times-ը՝ վկայակոչելով տեղական կառավարության զեկույցը։
Ըստ հրապարակման՝ դրանք նախնական գնահատականներ են, և սպասվում է, որ թվերը կմեծանան։ Լոս Անջելեսի քաղաքային ենթակառուցվածքին հասցված վնասների ճնշող մեծամասնությունը վերագրվել է Պալիսադեսի հրդեհին, որն ավերել է ավելի քան 6600 շինություն և վնասել 890 այլ կառույցներ: Բացի վնասված ենթակառուցվածքներից, քաղաքապետարանը հրդեհների հետեւանքների վերացման ծախսերը գնահատում է 24 մլն դոլար, նշում է թերթը։
AccuWeather խորհրդատվական ընկերության տվյալներով՝ Կալիֆոռնիայում անտառային հրդեհների ընդհանուր տնտեսական վնասը գերազանցել է 250 միլիարդ դոլարը։
Անտառային հրդեհները սկսեցին տարածվել Լոս Անջելեսի շրջանում հունվարի 7-ին: Օդերեւութաբանների կարծիքով՝ դրա պատճառը չոր ու շատ քամոտ եղանակն էր։ Հրդեհների ընդհանուր մակերեսը գերազանցել է 16 հազար հեկտարը։ Հրդեհը ոչնչացրել է ավելի քան 12,3 հազար շենք, այդ թվում՝ հայտնի մարդկանց տներ։ Վերջին տվյալներով՝ զոհվել է 25 մարդ։ Տնտեսական վնասը գերազանցում է 250 միլիարդ դոլարը։
