Իսրայելի նախագահ Իցհակ Հերցոգը որոշում չի կայացրել և չի կարող կայացնել Իսրայելի վարչապետ Բենիամին Նեթանյահուին ներում շնորհելու վերաբերյալ, մինչև Արդարադատության նախարարությունը չներկայացնի իրավական կարծիք։ Այս մասին հաղորդում է The Times of Israel-ը։
«Միայն այդ գործընթացի ավարտից հետո նախագահ Հերցոգն, օրենքին համապատասխան և Իսրայելի պետության շահերից ելնելով, կքննարկի խնդրանքը՝ առաջնորդվելով իր խղճով և առանց որևէ արտաքին կամ ներքին ճնշումների ազդեցության», - նշվել է Հերցոգի գրասենյակի հայտարարության մեջ։
«Նախագահ Հերցոգը բարձր է գնահատում նախագահ Թրամփին Իսրայելի Պետության և նրա անվտանգության համար իր նշանակալի ներդրման համար։ Իսրայելն ինքնիշխան պետություն է, որն առաջնորդվում է օրենքի գերակայությամբ», - ասվում է հայտարարության մեջ։
ԱՄՆ նախագահ Դոնալդ Թրամփը հայտարարել է, որ նախագահ Իցհակ Հերցոգը «պետք է ամաչի իրենից» վարչապետ Բենիամին Նեթանյահուին ներում չշնորհելու համար, որը դատարանի առաջ է կանգնած խարդախության, կաշառակերության և վստահության չարաշահման մեղադրանքով։
«Դուք ունեք նախագահ, որը հրաժարվել է նրան ներում շնորհել… (Նա) պետք է ամաչի ինքն իրենից», - ասել է Թրամփը լրագրողների հետ զրույցում։
Նրա խոսքով՝ Իսրայելի ժողովուրդը պետք է իսկապես ամաչեցնի նրան ներում չշնորհելու համար։
Թրամփը 2025 թ. հունիսից ի վեր կոչ է անում ներում շնորհել Նեթանյահուին, սակայն փետրվարի 12-ին առաջին անգամ նա հրապարակայնորեն հանդիմանել է Հերցոգին՝ վարչապետին ներում չտրամադրելու համար։
Լրագրողների հետ զրույցում նա կրկին գովաբանել է Նեթանյահուին՝ անվանելով նրան «շատ լավ պատերազմական վարչապետ», և բարձր գնահատել Իրանի դեմ իրենց համատեղ հաջողությունները։
Մեկնաբանությունները հնչել են Թրամփի և Նեթանյահուի՝ Սպիտակ տանը հանդիպումից մեկ օր անց, ինչը ենթադրություններ է առաջացրել, որ հանդիպման ժամանակ Իսրայելի վարչապետը բարձրացրել է այդ հարցը։
Թրամփը Վաշինգտոնում Նեթանյահուին ընդունել էր փետրվարի 11-ին։
