Եթե Հայաստանի Սահմանադրության փոփոխության բոլոր ընթացակարգերը պահպանվեն, ապա գործընթացը կարող է տևել վեց ամսից մինչև մեկ տարի։ Այս մասին փետրվարի 6-ին լրագրողների հետ հանդիպմանն ասաց «Հայաքվե» նախաձեռնության համակարգող Ավետիք Չալաբյանը։
Նա վստահություն հայտնեց, որ այդ ժամանակը բավական կլինի միասնական ճակատ ձեւավորելու եւ Հայաստանի իշխանություններին ապազգային որոշումներ ընդունելու թույլ չտալու համար։
Չալաբյանը պարզաբանեց, որ բռնություն կամ տեռոր չի լինելու, պայքարը տարվելու է օրենքի շրջանակներում՝ սրտի ու մտքի համար։ «Մենք հաջողության հասնելու ենք, բայց մենք չենք, որ ժամանակ ենք սահմանում նպատակներին հասնելու համար։ Կա ընթացակարգ. Սահմանադրական փոփոխությունները պետք է սկսվեն հրապարակային քննարկումներից, հետո անցնեն խորհրդարանում քննարկմանը, ապա նախագիծը ներկայացվի Սահմանադրական դատարան։ Սրանից հետո պետք է սկսել քարոզարշավը, որը կտեւի 50-60 օր»,- ընդգծեց նախաձեռնության համակարգողը։
Նրա խոսքով, «Հայաքվե» նախաձեռնության կողմից հարցված քաղաքացիների 77%-ը կարծում է, որ Լեռնային Ղարաբաղը պետք է վերադարձվի զենքի ուժով, իսկ մյուս հարցվածների 88%-ը կարծում է, որ դա հնարավոր է անել դիվանագիտական ճանապարհով։
Ըստ Չալաբյանի՝ սա խոսում է այն մասին, որ բնակչության ճնշող մեծամասնությունը չի ընդունում կառավարության քաղաքականությունը։ «Այն, ինչ տեղի ունեցավ Լեռնային Ղարաբաղի հետ, կարող է պատահել Հայաստանի հետ. Սա պետք է գիտակցենք, և երբ գիտակցում ես, սկսում ես դիմադրել»,- ասաց նա։
