Հայաստանի հայերի միության նախագահ Արա Աբրահամյանը TASS-ին տված հարցազրույցում հայտարարել է, որ 2026 թվականի խորհրդարանական ընտրություններում կաջակցի Հայաստանում ներկայիս վարչապետ Նիկոլ Փաշինյանի դեմ հանդես եկող քաղաքական ուժերի միավորմանը։
«Ես մտադիր չեմ մասնակցել առաջիկա ընտրություններին, սակայն Հայաստանի վերածննդի համար ես կօգտագործեմ իմ բոլոր հնարավորությունները և կօգնեմ միավորել այն առողջ ուժերը, որոնք ունակ են հետևողականորեն և հայրենիքի հանդեպ սիրով օգտագործել առկա տնտեսական և մարդկային ներուժը, այդ թվում՝ սփյուռքը», - ասել է նա։
Աբրահամյանը նշել է, որ Փաշինյանի կառավարությունը կորցրել է Լեռնային Ղարաբաղը, երկրի կարևորագույն օբյեկտների վերահսկողությունը հանձնում է օտարերկրացիներին, ավելացնում է Հայաստանի պարտքը և նպաստում է գների աճին։
«Վերջին յոթ տարիների պատմությունը տխուր վկայությունն է այն բանի, թե ինչպես Փաշինյանը՝ շահարկելով հասարակական տրամադրությունները, իրեն հավատացած մարդկանց դարձրեց ակամա մասնակիցներ այն խաբեության և ազգային ողբերգության, որի ականատեսն ենք այսօր», — հավելել է նա։
Աբրահամյանը միևնույն ժամանակ նշել է, որ հայերի մեծամասնությունը սիրում է իրենց հայրենիքը և պատրաստ է միավորվել հանուն դրա պահպանման և բարգավաճման։ «Իսկ մոլորվածների հետ պետք է շփվել և բացատրել պարզ մի բան. կարելի է կորցնել բիզնեսը, բայց սկսել զրոյից և հարստանալ, կարելի է կորցնել և նորից ձեռք բերել ընկերներ, բայց հայրենիքը կորցնողը կորցնում է ամեն ինչ», - հավելել է Ռուսաստանի հայերի միության նախագահը։
