Հայաստանի իշխանությունները ընդդիմադիր ուժի նկատմամբ իրականացնում են քաղաքական վենդետա․ Տոնոյան

Ավելի վաղ հաղորդվել էր, որ Հայաստանի Կենտրոնական ընտրական հանձնաժողովը հունիսի 11-ի արտահերթ նիստում անվավեր է ճանաչել քվեարկության արդյունքները N 10/51 և N 35/65 ընտրատեղամասերում։

Տոնոյանի խոսքով՝ տեղի է ունենում ուղղակի միջամտություն ընտրական գործընթացին, և խախտվում են ընտրությունների թափանցիկությունն ու լեգիտիմությունը։ Նա հիշեցրել է, որ քվեարկության ավարտից հետո թվերը մշտապես փոխվում էին, և ԲՀԿ-ն պահանջել էր վերահաշվարկ, որի արդյունքով ԲՀԿ-ն ստացել էր երկու անգամ ավելի շատ ձայն, քան ԲՀԿ-ին չէր բավականացնում անցողիկ շեմը հաղթահարելու համար։

«Երեկ ԿԸՀ-ն իրականացրեց Նիկոլ Փաշինյանի ցանկությունը ԲՀԿ-ին խորհրդարան չթողնելու համար, անվավեր ճանաչվեցին այն տեղամասերի արդյունքները, որտեղ ԲՀԿ-ն ավելի շատ ձայն էր հավաքել։ Սա ուղիղ հարված է ժողովրդավարությանը, բոլոր ընդունված և չընդունված նորմերին։ Սա քաղաքական վենդետա է ընդդիմադիր ուժի նկատմամբ»,- հայտարարել է Տոնոյանը՝ ընդգծելով, որ փորձագետներն ու հանրությունը ստեղծված իրավիճակի կապակցությամբ աջակցություն են հայտնել ԲՀԿ-ին։ «Տեղի ունեցածը կասկածի տակ է դնում ընտրությունների արդյունքների լեգիտիմությունը և քաղաքացիների ազատ ընտրության իրավունքի իրացումը»,- ընդգծել է Տոնոյանը։

ԲՀԿ ներկայացուցիչ Էլինար Վարդանյանը ներկայացրել է տեղի ունեցածի իրավական բաղադրիչը՝ հայտարարելով, որ ԿԸՀ-ն չի անդրադարձել այն հարցին, թե նշված տեղամասերում արդյունքներն ինչպես են ընդհանուր առմամբ ազդել վերջնական արդյունքների վրա, և ամեն դեպքում պետք է այդ տեղամասերում անցկացնի կրկնակի ընտրություն։ Կրկնակի քվեարկություն պահանջելուց բացի՝ ԲՀԿ-ն մտադիր է նաև հայց ներկայացնել դատարան։ «Ակնհայտ է, որ սա քաղաքական որոշում է՝ օգտագործելու բոլոր հնարավորությունները, որպեսզի ԲՀԿ-ին չթողնեն խորհրդարան, ինչն իշխանությունների համար կենսական կարևորություն ունեցող խնդիր է»,- համոզված է Վարդանյանը։ ԲՀԿ-ից պատգամավորության թեկնածու Արեգնազ Մանուկյանի տանը կատարված խուզարկությունը նա անվանել է խուլիգանություն՝ նշելով, որ իրավապահ համակարգը դրվել է իշխանությունների ապօրինի որոշումները սպասարկելու ծառայության մեջ։