Մոսկվան ակնկալում է, որ Բաքվի և Երևանի հետ շփումները, որոնք համաձայնեցվել են Հայաստանի, Ռուսաստանի և Ադրբեջանի արտգործնախարարների հանդիպմանը, տեղի կունենան առաջիկա ամիսներին: Այս մասին ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Ռուսաստանի համար երկու եղբայրական ժողովուրդների հաշտեցման գործընթացը պետք է ընդգրկի նաև հումանիտար ոլորտը։ Հայ-ադրբեջանական հարաբերությունների կարգավորումը հարթ չի ընթանում, ինչպես մենք բոլորս շատ լավ տեսնում և հասկանում ենք, բայց խաղաղությունն այլընտրանք չունի»,- ասել է նա։
Զախարովան անդրադարձել է նաև Հայաստանում ԵՄ դիտորդական առաքելության գործունեությանը:
«Կանադացիների հայտնվելը Հայաստանում հստակորեն հաստատում է, որ ԵՄ-ն, որն ամբողջությամբ կորցրել է արտաքին քաղաքական անկախությունը, զբաղված է ԱՄՆ-ի և ՆԱՏՕ-ի շահերի սպասարկմամբ։
ԵՄ առաքելությունը երկկողմ հարաբերություններում միայն կայծ տվեց, բայց հայ-ադրբեջանական սահմանին բախումները դրանից չնվազեցին»։
