Հաշվեքննիչ պալատը դրական եզրակացություն է տվել Հայաստանի Հանրապետության 2024թ. պետական բյուջեի կատարման հաշվետվությանը։ Այս մասին հունիսի 18-ին Ազգային ժողովի նիստում, համապատասխան հարցի քննարկման ժամանակ, հայտնել է պալատի ղեկավար Ատոմ Ջանջուղազյանը։ «Պետական բյուջեի աուդիտի արդյունքում արձանագրվել են 83 անհամապատասխանություն եւ 6 աղավաղում, որոնք, սակայն, չեն ազդել փորձագետների կարծիքի վրա: Փաստն այն է, որ ընդհանուր առմամբ այդ անհամապատասխանություններն ու աղավաղումները կազմել են աուդիտի ենթակա ծախսերի ընդամենը 0.11 տոկոսը: Բացարձակ թվերով խոսքը 3.1 մլրդ դրամի մասին է, որը զգալիորեն ցածր է սահմանված շեմից»,- հայտնել է Ջանջուղազյանը:
