Այն, որ մեր երկրում իրավիճակը պայթյունավտանգ է, երկրորդ կարծիք լինել չի կարող. Սյունիքում ադրբեջանական զինուժը նոր խրամատներ են փորում, եւ այս փաստը չեն ժխտում նույնիսկ իշխանությունները: Այս մասին, այսօր՝ մարտի 5-ին, ԱԺ ճեպազրույցների ժամանակ նշեց ԱԺ ԲՀԿ խմբակցության պատգամավոր Իվետա Տոնոյանը:
«Ստացվում է՝ Սյունիքի դարպասները բաց են թշնամու առաջ, փոխարենը՝ ժողովրդի առաջ զոդում են ԱԺ դարպասները: Դրանում համոզվեցինք երկու օր առաջ, երբ ԱԺ-ի շենքից դիպուկահարները նշանառության տակ էին վերցրել խաղաղ ցույցի մասնակիցներին: Որքան էլ իշխանության ներկայացուցիչները փորձեն դրա համար մտացածին հիմնավորումներ ներկայացնել, սա չունի որեւէ արդարացում ու բացատրություն»,- ասաց պատգամավորը՝ նշելով, թե իշխանություններն իրենց սեփական վախերը փարատելու նպատակով պատրաստ են ամեն քայլի:
«Մարտի 1-ի հանրահավաքի կազմակերպչական աշխատանքների ընթացքում բոլորս տեսանք, թե ինչ կարգի պետական եւ վարչական ռեսուրս օգտագործվեց իշխանությունների կողմից»,- ասաց Տոնոյանը՝ նշելով, թե չի հասկացել՝ ինչու էին իշխանականները ոգեւորությամբ տարածում այդ հանրահավաքի լուսանկարները։
«Մաթեմատիկական նվազագույն գիտելիքներ ունեցող մարդը շատ լավ կարող էր հասկանալ, որ Հանրապետության հրապարակում հավաքված է իշխանությանը, Նիկոլ Փաշինյանին վստահության քվե տված շուրջ 880 հազար քաղաքացիների ընդամենը 3 տոկոսը»,-ասաց Իվետո Տոնոյանը:
