ԱՄՆ նախագահի Մերձավոր Արևելքի հարցերով բանագնաց Սթիվ Ուիթքոֆը ՀԱՄԱՍ շարժման ղեկավարության և ԱՄՆ նախագահ Դոնալդ Թրամփի վարչակազմի միջև գլխավոր միջնորդ համարվող պաղեստինա-ամերիկացի գործարար Բիշարա Բահբահի միջոցով նամակ է ուղարկել ՀԱՄԱՍ-ին։ Դրանում նշվում է, որ հրադադարը կշարունակվի 60-օրյա հրադադարից հետո, եթե բանակցությունները շարունակվեն, և որ Թրամփի վարչակազմը հանձնառու է դա ապահովելուն։ Այս մասին հայտում է Al Arabia-ն՝ հղում անելով տեղեկացված աղբյուրներին։
Համաձայն տեղեկությունների՝ ՀԱՄԱՍ-ը պահանջում է, որ իսրայելական բանակը նահանջի մարտին՝ նախորդ հրադադարի խզումից առաջ զբաղեցրած դիրքեր, սակայն Իսրայելը հրաժարվում է դա անել։
Ավելի վաղ ԱՄՆ բանագնաց Սթիվ Ուիթքոֆը հայտարարել էր, որ Դոհայում բանակցությունների ժամանակ Իսրայելը և ՀԱՄԱՍ-ը կարողացել են լուծել չորս չլուծված հարցերից երեքը՝ հավելելով. «Մենք հույս ունենք համաձայնության հասնել այս շաբաթվա վերջին»։
Առաջարկվող համաձայնագիրը ներառում է 60-օրյա հրադադար, որի ընթացքում ՀԱՄԱՍ-ը կազատի տասը ողջ մնացած պատանդներին և կհանձնի մի քանիսի աճյունները՝ Իսրայելում բանտարկված պաղեստինցիների ազատ արձակման դիմաց։
ՀԱՄԱՍ-ը նաև պահանջում է որոշակի պայմաններ Իսրայելի ուժերի դուրսբերման համար, ինչպես նաև երաշխիքներ, որ Իսրայելը չի վերսկսի ռազմական գործողությունները 60-օրյա հրադադարից հետո, և ՄԱԿ-ը կգլխավորի օգնության բաշխման համակարգը։
Հիմնական անհամաձայնությունը վերաբերում է Գազայից Իսրայելի զորքերի դուրսբերմանը։
Հուլիսի 6-ին ՀԱՄԱՍ-ը և Իսրայելը Եգիպտոսի, Կատարի և Միացյալ Նահանգների միջնորդությամբ Դոհայում վերսկսել են բանակցություններն՝ ուղղված պաղեստինյան անկլավում հրադադարի և այնտեղ պահվող իսրայելցի պատանդների ազատ արձակման վերաբերյալ համաձայնության հասնելուն։ Ուիթքոֆը հաջորդ շաբաթ կարող է մեկնել Դոհա՝ միանալու բանակցություններին։
