«Հուսով եմ՝ մենք կտեսնենք Զանգեզուրի միջանցքի իրականացումը այնպես, ինչպես ցանկանում է Ադրբեջանը, քանի որ այն կարևոր է Կենտրոնական միջանցքի համար», - KanalT-ի փոխանցմամբ՝ այսօր՝ հունվարի 15-ին, մամուլի ասուլիսում ասել է Թուրքիայի արտգործնախարար Հաքան Ֆիդանը։
Թուրքիայի արտգործնախարարի խոսքով՝ ավելի լայն ռազմավարական համատեքստում այսպես կոչված «Զանգեզուրի միջանցքը» «կարևոր է նաև տարածաշրջանային առումով, մասնավորապես՝ Նախիջևանը մայրցամաքային Ադրբեջանի հետ միավորելու համար»։
«Իհարկե, Կենտրոնական միջանցքը նույնպես օգտակար է Թուրքիայի համար, քանի որ այն թույլ է տալիս նրան այս երթուղով ուղիղ մուտք ունենալ թյուրքական աշխարհ և Կենտրոնական Ասիա։ Այս ուղղությամբ ինտենսիվ աշխատանքներ են տարվում։ Երբ Հայաստանի արտգործնախարարը գտնվում էր Ամերիկայում, հրապարակվեց մի փաստաթուղթ։ Այն կոչվում է «ճանապարհորդություն», նկատի ունենալով այն, ինչ մենք անվանում ենք Զանգեզուրի միջանցք։ Ինչպե՞ս կարող ենք այն իրականացնել։ Այս պահին կան որոշ տեխնիկական հարցեր, որոնք կապված են դրա հետ։ Մենք շատ ուշադիր ուսումնասիրել ենք այս փաստաթուղթը։ Երեկ ավելի ուշ ես մոտ երկու ժամ զրուցեցի իմ հարգարժան գործընկեր Ջեյհուն Բայրամովի հետ՝ քննարկելով, թե «ինչ է գրված այս փաստաթղթում և ինչպես են նրանք մեկնաբանում այն», քանի որ նրանց տեսակետը կարևոր է։ Մենք նաև տեղեկացրել ենք մեր նախագահին այս մասին», - ասաց Ֆիդանը։
Ըստ նրա, կան բազմաթիվ տեխնիկական հարցեր։
«Մենք ցանկանում ենք, որ Ադրբեջանի և Հայաստանի միջև արդեն ստորագրված համաձայնագիրը վերջնականապես հաստատվի ստորագրությամբ, և Թուրքիայի և Հայաստանի միջև հարաբերությունների կարգավորումը հնարավորինս շուտ իրականացվի, որպեսզի մենք կարողանանք շարունակել մեր ուղին դեպի կայունություն և բարգավաճում տարածաշրջանում։ Ներկայումս Ադրբեջանի, Հայաստանի և Թուրքիայի քաղաքական ղեկավարությունները կիսում են այս ցանկությունը։ Հայաստանին մնացել է միայն մի քանի բան անել», - հայտարարել է Ֆիդանը։
Թուրքիայի արտգործնախարարը նաև մեկնաբանել է Հայաստանում կայանալիք խորհրդարանական ընտրությունները։
«Ինչպես գիտեք, հունիսի սկզբին Հայաստանում ընտրություններ են անցկացվելու։ Սա կարևոր քայլ կլինի, բայց մենք տեսնում ենք, որ պարոն Փաշինյանն այժմ առաջատար է հասարակական կարծիքի հարցումներում։ Մենք անկեղծորեն աջակցում ենք նրա կառուցողական դերին այս հարցում։ Այս մոտեցումը, այս ցանկությունը պետք է պահպանվի», - ասել է նա։
