Երևանում 2024 թվականին կառուցվելու է 400 թեքահարթակ։
«Արմենպրես»-ի փոխանցմամբ՝ այս մասին փետրվարի 12-ին Երևանի քաղաքապետարանի գործակարգավարական խորհրդակցության ժամանակ հայտնեց Երևանի քաղաքապետ Տիգրան Ավինյանը:
Խորհրդակցության ընթացքում զեկուցվեց, որ կա թեքահարթակների կառուցման երեք տարբերակ՝ միակողմ, երկկողմ և եռակողմ մոտեցումներով: Տեսողության խնդիրներ ունեցող հետիոտների համար թեքահարթակները երեսպատվելու են բազալտե անհարթ սալիկներով և, ըստ տեղանքի, իրականացվելու են միակողմ, երկկողմ և եռակողմ տարբերակներով:
Քաղաքապետ Տիգրան Ավինյանը նշեց, որ վերջապես թեքահարթակների մասով առկա է հստակ ստանդարտ։ Եթե որևէ վարչական շրջան թեքահարթակ է կառուցում, այն պետք է համապատասխանի ստանդարտներին:
«Այս տարի պլանավորել ենք կառուցել 400 թեքահարթակ։ Խնդրում եմ հարգելի գործընկերներ ստանդարտին պետք է խստորեն հետևել, և պետք է ուշադիր լինենք, որ մեր շինարարները նույնպես խստորեն հետևեն սահմանված ստանդարտներին, անորակ աշխատանք ընդունել չենք կարող»,- ասաց Ավինյանը:
