Երևանի քաղաքապետ Տիգրան Ավինյանը մայիսի 5-ին կայացած գործակարգավարական խորհրդակցության ժամանակ հատուկ ուղերձով դիմել է Մալաթիա-Սեբաստիա վարչական շրջանի ղեկավար Ռոմիկ Մխիթարյանին՝ անդրադառնալով վերջինիս հանրային հայտարարությանը, ըստ որի՝ Նոր Նորքի թաղապետի հնարավոր ազատման դեպքում «Հանրապետություն» կուսակցության ներկայացուցիչները վայր կդնեն իրենց լիազորությունները։
Ավինյանը հիշեցրեց, որ Երևանի քաղաքապետարանը գործադիր մարմին է, ոչ թե կուսակցական կառույց, և այն ծառայում է բացառապես մայրաքաղաքի և երևանցիների շահերին։
«Երևանի քաղաքապետարանը կուսակցական կառույց չի։ Այո, Երևանի քաղաքապետարանը քաղաքական պաշտոններում ունի կուսակցականներ, որոնք ելնում են իրենց կուսակցության քաղաքական գաղափարախոսությունից, բայց ուզում եմ կրկին անգամ բոլորիդ հիշեցնել, որ դուք Երևանի քաղաքապետի ներկայացուցիչներն եք ձեր վարչական շրջաններում, և համապատասխանաբար ես պետք է ձեզ խնդրեմ և պահանջեմ, որ ձեր հայտարարություններում առաջին հերթին ելնեք դրանից, որովհետև մենք կուսակցական կարող ենք լինել շատ երկար ժամանակ, բայց ձեր պաշտոնները այս պահի դրությամբ ծառայություն է Երևանին և երևանցիներին ձեր վարչական շրջանում։ Առաջին հերթին ձեր ծառայությունը պետք է լինի գերակա ձեզ համար»,- ընդգծեց քաղաքապետը։
Նա նշեց, որ նման զգայուն հարցերում հրապարակային հայտարարությունները պետք է լինեն առավելագույնս զգույշ։
«Ձեր հայտարարություններում մաքսիմալ զգուշություն պետք է պահանջեմ։ Եվ, պարոն Մխիթարյան, մենք խոսել ենք սրա մասին, Ձեր հայտարարությունը սխալ էր, որովհետև Երևանի քաղաքապետը չի կարող որոշումներ կայացնել՝ միայն կուսակցական, գործընկերային կամ այլ տրամաբանությունից ելնելով։ Տարբեր պատճառներով որևէ մեկը կարող է դուրս գալ աշխատանքից և մեկ ուրիշը կարող է ընդունվել աշխատանքի։ Ես հուսով եմ, որ մենք իրար հասկացանք»,- եզրափակեց Ավինյանը։
