Աշխարհի փորձը ցույց է տալիս, որ ծայրահեղ աղքատությունը կամ առհասարակ աղքատությունը կարելի է կրճատել միայն ու միայն կրթության միջոցով: Այս մասին այսօր՝ հոկտեմբերի 23-ին, ԱԺ-ում «Սոցիալական աջակցության մասին» օրենքի նախագծի քննարկման ժամանակ նշեց ՔՊ-ական պատգամավոր Լիլիթ Ստեփանյանը:
«Հետեւաբար, եթե ընտանիքի երեխան ունի սոցիալական խնդիրներ, այնուամենայնիվ դուրս է մնում հանրակրթությունից կամ կրթությունից առհասարակ, ապա սա միանշանակ ապացույց է, որ այս ընտանիքը շարունակելու է մնալ սոցիալական ծանր պայմաններում եւ շարունակելու է աջակցություն ստանալ:
Երկրորդը, եթե սոցիալապես անապահով ընտանիքի կամ առհասարակ ընտանիքի երեխան դուրս է մնում կրթությունից կամ հանրակրթությունից, ապա ամենեւին չի նշանակում, որ հիմնական պատճառը կոշիկի կամ հագուստի բացակայությունն է: Բազմաթիվ են այն դեպքերը, երբ երեխաներին ընտանիքի անդամները կամ ծնողները դպրոցում սովորելու կամ մանկապարտեզ հաճախելու ընթացքում բոլորովին այլ տեղեր են ուղարկում: Մասնավորապես, անընդհատ մամուլում տեղ են գտնում այնպիսի հրապարակումներ, որ երեխան դպրոցի փոխարեն, ծնողների կամ այլ անձանց դրդմամբ զբաղվում է մուրացկանությամբ»,-ասաց նա:
