Թուրքիայի տրանսպորտի նախարար Աբդուլքադիր Ուրալօղլուն խոսել է «Զարգացման երթուղու» և «Զանգեզուրի միջանցք» նախագծերի վերջին զարգացումների մասին, որոնք նպատակ ունեն նվազեցնել ծովային տրանսպորտային հանգույցներից կախվածությունը:
Կարսից մինչև Նախիջևանի սահման երկաթուղու շինարարության մեկնարկի մասին հայտարարելով՝ Ուրալօղլուն նշել է, որ Թուրքիայի աշխարհատնտեսական դիրքը ամրապնդելու ռազմավարական քայլերը կշարունակվեն առանց ընդհատման։
«Մենք սկսել ենք երկաթուղային ենթակառուցվածքի կառուցումը Կարսից մինչև Նախիջևանի սահման հատվածում։ Մենք լիովին կատարում ենք «Զանգեզուրի միջանցքի» իրականացման պահին մեզ վրա դրված պատասխանատվությունը և վճռականորեն առաջ ենք շարժվում, որպեսզի ապահովենք անխափան երկաթուղային ինտեգրումը Թուրքական պետությունների կազմակերպության աշխարհագրությանը: Սակայն «Զանգեզուրի միջանցքի» հիմնական տարանցիկ գիծը, որն անցնում է Հայաստանի Մեղրու շրջանով, ունի մոտ 42-43 կիլոմետր երկարություն։ Մենք տեսնում ենք, որ շինարարությունը դեռևս չի սկսվել՝ ԱՄՆ-ի միջնորդությամբ Ադրբեջանի և Հայաստանի միջև ընթացող բանակցային գործընթացի պատճառով»,- ասել է նա։
Ըստ նրա՝ Նախիջևանում մոտ 80 կիլոմետր երկարությամբ գործող գծի արդիականացման և բարելավման աշխատանքներն ավարտվել են, և 15-20 կիլոմետր երկարությամբ նոր գծի շինարարությունը նույնպես ընթանում է ըստ պլանի։
«Ադրբեջանցի պաշտոնյաների խոսքով, եթե հայկական կողմից շինարարական աշխատանքները սկսվեն այս տարի, գծերը, ենթադրաբար, կավարտվեն հինգ տարվա ընթացքում»,- ընդգծել է Ուրալօղլուն։
