Ռուսաստանի դեմ ԵՄ պատժամիջոցները տարածվել են նաև Թուրքիայում գտնվող Ադրբեջանի պետական STAR նավթավերամշակման գործարանի վրա։
Նավթամշակման գործարանից ներմուծումն արգելված է ԵՄ 18-րդ պատժամիջոցների փաթեթի համաձայն, որն արգելում է ռուսական հում նավթից պատրաստված նավթամթերքի ներմուծումը, եթե դրանք վերամշակվում են երրորդ երկրներում։
ԵՄ արտաքին գործերի խոսնակ Անիտա Հիփերը OC Media-ին հաստատել է, որ պատժամիջոցների է ենթարկվել նաև STAR-ը, որը Ադրբեջանի կառավարության և պետական նավթային SOCAR ընկերության համատեղ սեփականություն է կազմում։
Նա ընդգծել է, որ նպատակը Ռուսաստանին նավթային եկամուտներից զրկելն է։
«Սա նպատակ ունի կանխել ռուսական հում նավթի` որևէ ձևով ԵՄ շուկա հասնելը», - հավելել է ԵՄ պաշտոնյան։
Սա կարող է նշանակել STAR-ի դերի ավարտը եվրոպական գնորդներին ռուսական նավթ մատակարարելու գործում։ Ուկրաինայում պատերազմի սկսվելուց ի վեր Ադրբեջանին հաճախ մեղադրել են ռուսական բրածո վառելիքը իր ենթակառուցվածքների միջոցով «վերավաճառելու» մեջ։
