Հնդկաստանում Հայաստանի դեսպան Վահագն Աֆյանը, որը նաև համատեղության կարգով Բանգլադեշում Հայաստանի դեսպան է նշանակվել (նստավայրը՝ Նյու Դելի) իր հավատարմագրերն է հանձնել Բանգլադեշի Ժողովրդական Հանրապետության նախագահ Մոհամմեդ Շահաբուդդինին։
Այս մասին նշված է Հնդկաստանում ՀՀ դեսպանության տարածած հաղորդագրության մեջ։
Բանգլադեշում ՀՀ դեսպանը պատրաստակամություն է հայտնել ջանքեր ներդնել երկկողմ հարաբերությունների զարգացման և համագործակցության ակտիվացման գործում, իսկ Բանգլադեշի նախագահը հաջողություն է մաղթել նրան այդ գործում։
Մինչ այդ դեսպան Վ. Աֆյանն իր հավատարմագրերի պատճենն էր հանձնել Բանգլադեշի ԱԳՆ արարողակարգի գլխավոր վարչության պետին: Զրույց է կայացել նաև Բանգլադեշի ԱԳ քարտուղար (նախարարի առաջին տեղակալ) Մոհամմադ Ջասհիմ Ուդդինի հետ: Իսկ նախորդ օրը ՀՀ դեսպանի և Բանգլադեշի ԱԳՆ Արևելյան Եվրոպայի և ԱՊՀ գլխավոր վարչության պետի միջև կայացած հանդիպմանը քննարկումներ են ծավալվել երկկողմ և բազմակողմ համագործակցության ամրապնդմանն ուղղված օրակարգային հարցերի շուրջ: Երկուստեք նախանշվել են փոխշահավետ գործակցության հետագա խորացման և առաջիկա ընդլայնման ուղիներ:
Բանգլադեշի Ժողովրդական Հանրապետության նախագահական Բանգաբհաբան նստավայրում դեսպան Վ. Աֆյանն այցելել է երկրի նախագահի և վարչապետի կողմից ստացվող նվերների Տոշակհանա թանգարան, ուր այցելում են օտարերկրյա բարձրաստիճան հյուրեր և որի շինությունը կրում է հայազգի Մանուկի Տուն անունը:
Նշվում է, որ ՀՀ դեսպանն այցելել է նաև հին Դաքքայի Արմանիթոլա թաղամասի Հայաստան փողոցում գտնվող, 1781 թվականին կառուցված Սուրբ Հարություն հայ առաքելական եկեղեցի:
