ԱՄՆ նախագահ Դոնալդ Թրամփը վերջին օրերին ավելի ու ավելի քիչ է ներգրավված ուկրաինական ճգնաժամի հարցում, երեքշաբթի օրը հաղորդել է ABC News-ը՝ հղում անելով անանուն ամերիկացի պաշտոնյաների։
«Դեռ մինչև վերջին Ռուսաստան-Ուկրաինա բանակցությունները, Թրամփի մոտ աճում էր հիասթափությունը խաղաղության ուղղությամբ առաջընթացի բացակայությունից։ Նրա մտածողությանը ծանոթ պաշտոնյաները նշում են, որ չնայած նա նախկինում խիստ քննադատել է և՛ Ուկրաինային, և՛ Ռուսաստանին, վերջին օրերին նա շատ ավելի քիչ է ներգրավված», - հաղորդում է հեռուստաալիքը։
Բացի այդ, Ռուսաստանի և Ուկրաինայի միջև բանակցությունների երկրորդ փուլից հետո ԱՄՆ վարչակազմի պաշտոնյաները ABC News-ին ասել են, որ «հիասթափված են, բայց զարմացած չեն Ռուսաստանի պահանջների լայն ցանկից, որոնք, ըստ նրանց, պետք է կատարվեն 30-օրյա հրադադարի համաձայնեցումից առաջ»։ Աղբյուրների համաձայն, ԱՄՆ վարչակազմը և Ուկրաինան Մոսկվայի մի շարք պայմաններ անընդունելի են համարում։
ABC News-ը, սակայն, նշում է, որ Ստամբուլի բանակցություններից հետո չկա որևէ ցուցում, որ Թրամփի վարչակազմը պատրաստ է նոր պատժամիջոցներ կիրառել Ռուսաստանի նկատմամբ։
Երկուշաբթի օրը Ստամբուլում տեղի է ունեցել Ռուսաստանի և Ուկրաինայի պատվիրակությունների միջև բանակցությունների նոր փուլ։
