Գերմանիայի դատախազությունը երեքշաբթի օրը հայտարարել է, որ կանցլեր Ֆրիդրիխ Մերցին «Պինոկիո» անվանելը համապատասխանում է խոսքի ազատության մասին օրենքին։ Այս որոշումը կայացվել է Facebook-ում արված մեկնաբանությունների շուրջ ծագած վեճից հետո, որոնք ոստիկանությունը որակել էր որպես պոտենցիալ վիրավորական։ Այս մասին հայտնում է dpa գործակալությունը։
Գերմանական ոստիկանությունը երկուշաբթի օրը հայտնել է, որ ստուգում է մի շարք մեկնաբանություններ, որոնք առնչվում են Մերցի հարավարևմտյան Հայլբրոն քաղաք կատարած այցին։ Անցյալ տարի Հայլբրոնի ոստիկանությունը Facebook-ում հայտարարություն էր հրապարակել՝ կանցլերի այցի կապակցությամբ մեկ օրով թռիչքների արգելք սահմանելու մասին։
Այդ գրառումը հավաքել էր շուրջ 400 մեկնաբանություն, որտեղ բազմաթիվ օգտատերեր քննադատում էին կանցլերին՝ թռիչքների արգելքի ֆոնին։ Ոստիկանության ներկայացուցիչը երկուշաբթի օրը նշել է, որ որոշ մեկնաբանություններ ունեցել են «վիրավորական բնույթ»։ Մասնավորապես, օգտատերերը Մերցին անվանել են «Պինոկիո»՝ ի նկատի ունենալով փայտե տիկնիկին, որի քիթը երկարում էր ստելիս։
Ոստիկանության մեկնաբանությունները մեծ աղմուկ են բարձրացրել Գերմանիայում և նրա սահմաններից դուրս. սոցիալական ցանցերի օգտատերերն իրենց մտահոգությունն են հայտնել խոսքի ազատության վերաբերյալ։ Սակայն Հայլբրոնի դատախազությունը երեքշաբթի օրը պարզաբանել է, որ այն օգտատերը, ով Մերցին «Պինոկիո» էր անվանել, չի ենթարկվի իրավական հետևանքների։
Հայտարարության համաձայն՝ ոստիկանությունը հայտնաբերել է 38 մեկնաբանություն, որոնք ներկայումս ուսումնասիրվում են դատախազության կողմից՝ պարզելու համար, թե արդյոք դրանք պատժելի են օրենքով։ Այդուհանդերձ, դատախազությունն այդ ժամանակվանից դադարեցրել է «Պինոկիոն գալիս է Հայլբրոն» հրապարակման հետ կապված գործի վարույթը՝ պնդելով, որ դա իրենից ներկայացնում է «իշխանությունների հասցեին ուղղված քննադատություն, որը տեղավորվում է խոսքի ազատության շրջանակներում և, հետևաբար, թույլատրելի է»։
