Չինաստանը սահմանափակում է հազվագյուտ հողային մետաղների արտահանումը

Wall Street Journal-ը հղում անելով ոլորտի ներկայացուցիչներին՝ հայտնում է, որ Չինաստանը խիստ սահմանափակումներ է մտցրել արևմտյան պաշտպանական ընկերություններին անհրաժեշտ առանցքային հանքանյութերի արտահանման վրա, ինչը ստիպում է նրանց այլընտրանքային աղբյուրներ փնտրել երկրից դուրս։

Առևտրականները նշել են, որ որոշ անհրաժեշտ նյութերի գները նախապատերազմյան մակարդակից հինգ կամ ավելի անգամ բարձրացել են՝ Պեկինի սահմանափակումների պատճառով: ԱՄՆ զենքի մեջ օգտագործվող ավելի քան 80,000 մասերը պարունակում են հանքանյութեր, որոնք ենթարկվում են չինական արտահանման վերահսկողության և գրեթե բոլոր մատակարարման շղթաները կախված են չինացի մատակարարներից, ինչը լուրջ ռիսկեր է ներկայացնում ԱՄՆ պաշտպանության համար:

Բացի այդ, Չինաստանի իշխանությունները արևմտյան ընկերություններից պահանջում են մանրամասն տեղեկատվություն տրամադրել գնվող հանքանյութերի օգտագործման նպատակների մասին, որպեսզի կարողանան կանխել դրանց կիրառումը ռազմական ոլորտում։

Ապրիլի սկզբին Չինաստանի առևտրի նախարարությունը 16 ամերիկյան ընկերություններ է ներառել արտահանման վերահսկողության ցուցակում՝ սահմանափակելով երկակի նշանակության ապրանքների մատակարարումը։ New York Times-ի տեղեկատվությամբ՝ Պեկինը դադարեցրել է մի շարք կրիտիկական նշանակության հանքանյութերի և մագնիսների արտահանումը, որոնք անհրաժեշտ են ավտոմեքենաների, անօդաչու թռչող սարքերի, ռոբոտների և հրթիռների արտադրության համար։

Հունիսին Wall Street Journal-ը հաղորդել է, որ Չինաստանը մասամբ վերսկսել է հազվագյուտ մետաղների արտահանման լիցենզիաների տրամադրումը ԱՄՆ ավտոարտադրողներին և արդյունաբերական գործարաններին, սակայն թույլտվությունները սահմանափակված են վեց ամսով։ Սակայն ռազմական տեխնիկայի համար նախատեսված մասնագիտացված մագնիսների արտահանումը մնում է խիստ վերահսկողության տակ։