ԱԺ պետաիրավական հարցերի մշտական հանձնաժողովում քննարկվում է ՔՊ-ական պատգամավոր Հայկ Սարգսյանի նախագիծը, որն ավելի հայտնի է «Բանակից փողով ազատվելու» նախագիծ անվանումով։
Հիմնական զեկույցով հանդես եկավ նախագծի հեղինակ Հայկ Սարգսյանը։ Նա ներկայացրեց զորակոչի հետ կապված իրավիճակը՝ թվերով։
Սարգսյանը նշեց, որ 2020-2023 թթ. համար զորակոչի ենթակա քաղաքացիների մոտավոր թիվը կազմում է 30 հազար։
Պաշտպանության փոխնախարար Արամ Սարգսյանը, սակայն, առարկեց՝ նշելով, որ այդ թվերը չպետք է հրապարակվեն։ Դրան ի պատասխան Սարգսյանը նշեց, որ դրանք ստույգ տվյալներ չեն, այլ արհեստական բանականության միջոցով ստացված մոտավոր հաշվարկներ են։
«Կներեք, մենք եզրահանգումների գալու ենք արհեստական բանականության թվերո՞վ»,- հարցրեց հանձնաժողովի նախագահ Անդրանիկ Քոչարյանը։
Սարգսյանը պատասխանեց, որ թվերը վերցված են բոլորին հասանելի աղբյուրներից։
Պաշտպանության փոխնախարարn ընդգծեց, որ որոշ տվյալներ հրապարակման ենթակա չեն։
Քոչարյանը նշեց, որ ինքը կարող է նիստը փակել և կրկին բացել։ Իսկ երբ Սարգսյանը հայտարարեց, թե համաձայն չէ, Քոչարյանը արձագանքեց. «Ձեր համաձայնությունն այստեղ առաջնային չէ»։
Միջամտեց պաշտպանության փոխնախարարը՝ նշելով. «Եթե հնչեցվում են թվեր, որոնք ստույգ են, կարող են արտացոլել իրական վիճակագրությունը կամ նույնիսկ շատ մոտ լինեն նրան, ապա ես պնդում եմ, որ ցանկալի չէ այդ թվերը հնչեցնել և հրապարակային ներկայացնել։ Եթե տոկոսային հարաբերակցությամբ են ներկայացվում, դա արդեն այլ տրամաբանություն է։ Ինչ վերաբերում է արհեստական բանականությանը՝ այդպես մեր գործընկերները գուցե երբեք էլ չկարողանան հստակ կարծիք կազմել»։
Սարգսյանն հավելեց, որ ինքը չի ներկայացնում իրական թվեր, որպեսզի չխախտի գաղտնիության վերաբերյալ օրենսդրական պահանջները։ Նա պարզապես ցանկանում է ցույց տալ իրավիճակի պատկերը, որպեսզի խնդիրը հասկանալի լինի։
