Երևանի ավագանին քննարկում է Ազգային առաջընթաց խմբակցության անդամ, Երևանի նախկին քաղաքապետ Հայկ Մարությանի լիազորությունները վաղաժամկետ դադարեցնելու մասին հարցը։
Ինչպես տեղեկացրեց ավագանու «Քաղաքացիական պայմանագիր» խմբակցության ղեկավար Արմեն Գալջյանը, Մարությանը բացակայել է մինչ այժմ անցկացված բոլոր 42 քվեարկություններից. «Այսինքն՝ ոչ միայն կեսից ավելիից է բացակայել, այլ բոլոր քվեարկություններից»,- ասաց նա։
Գալջյանը նաև տեղեկացրել է, որ Մարությանը չի մասնակցել նաև հանձնաժողովի նիստերին, թեև ընդգրկված է Քաղաքաշինության և հողօգտագործման հարցերի մշատական հանձնաժողովում. «Կարծում եմ՝ պետք է բարձր գնահատենք ավագանու ինստիտուտի դերը, և ավագանու այն անդամները, որ արհամարհանք ունեն այս ինստիտուտի նկատմամբ, հեռանան և նրանց փոխարեն գան այլ ավագանու անդամներ նույն քաղաքական ուժից։ Շատ խոսվեց, որ ընդդիմադիրներին փորձում են խոսքից զրկել, բայց այնպես չէ, որ մանդատը մեզ է գալու։ Մանդատը մնալու է քաղաքական ուժին, որ ընտրություններին ստացել է համապատասխան քվե»,- ասաց նա։
