Հայաստանը պետք է ֆիզիկական և իրավաբանական անձանց համար համապարփակ էլեկտրոնային ծանուցման մեխանիզմ ներդնի։ Այս մասին նոյեմբերի 5-ին հայտարարել է ՀՀ արդարադատության նախարար Սրբուհի Գալյանը՝ խորհրդարանի պետաիրավական հարցերի մշտական հանձնաժողովի նիստում՝ «Ինտերնետի միջոցով հանրային և անհատական ծանուցման մասին» օրենքում փոփոխություններ և լրացումներ կատարելու և դրանց հետ կապված օրենքներում փոփոխություններ կատարելու մասին օրինագծերի փաթեթի քննարկման ժամանակ։
Նրա խոսքով՝ նախագծով առաջարկվում է քաղաքացիներին, ինչպես նաև իրավաբանական անձանց և անհատ ձեռներեցներին տեղեկացնել պետական մարմինների և տեղական ինքնակառավարման մարմինների կողմից բացառապես էլեկտրոնային եղանակով։ «Բոլոր փուլերը անցնելու դեպքում ծանուցումը կհամարվի առաքված»,- հայտնել է Գալյանը։
Ծանուցումները կուղարկվեն ֆիզիկական անձանց պաշտոնական էլեկտրոնային փոստին։ Իսկ իրավաբանական անձանց և անհատ ձեռներեցների համար կընտրվի հարկային հաշվետվությունների կառավարման էլեկտրոնային համակարգի անհատական էջը։
Արդարադատության նախարարության տվյալներով՝ միայն 2024 թվականին թղթային ծանուցումների վրա ավելի քան 653 միլիոն դրամ է ծախսվել։
Որոշակի քննարկումներից հետո այս օրենսդրական նախաձեռնությունը դրական արձագանք է ստացել մշտական խորհրդարանական հանձնաժողովի կողմից։
