Տարիների ծառայությունն ու հաղթանակներով կոփված փորձը կարող են վերածվել նոր առաքելության։ «Առաջարկ Հայաստանին» ծրագրին միանում են ուժային կառույցների մարզաշխարհի վետերանները՝ հանդես գալով նախաձեռնությամբ, որը միավորում է փորձառությունն ու երիտասարդական ներուժը․ ստեղծել վետերանների հասարակական մարզական ակումբներ։
Նրանց համոզմամբ՝ անցած ուղին միայն հիշողություն չէ, այլ պատասխանատվություն՝ փոխանցելու արժեքներ, ձևավորելու կամք և ամրապնդելու հայրենասիրական ոգին երիտասարդների շրջանում։ Վետերանների ներգրավումը հնարավորություն կտա զարգացնել ռազմամարզական պատրաստվածությունն ու առողջ ապրելակերպի մշակույթը, ինչպես նաև ձևավորել սերունդների միջև համագործակցության և փոխադարձ հարգանքի մթնոլորտ։
Նախաձեռնության առանցքում վետերանների մարզական ակտիվության բարձրացումն է Հայաստանում։ Ստեղծվող ակումբները նպատակ ունեն խթանել սպորտի զարգացումն ու առողջ կենսակերպը, կազմակերպել համայնքային և հանրապետական մարզական միջոցառումներ, ինչպես նաև ապահովել վետերանների միջև արդյունավետ համագործակցություն։ Կարևոր շեշտադրում է դրվում նաև ուսումնական և մարզական հաստատությունների հետ փոխգործակցության վրա՝ երիտասարդների ռազմահայրենասիրական և մարզական դաստիարակությունն ավելի համակարգված դարձնելու համար։
Մանրամասները՝ տեսանյութում.
