Փետրվարի 18-ի գիշերը Սիրիայում գտնվող «Հմեյմիմ» ավիաբազան, որտեղ տեղակայված է ՌԴ Ռազմատիեզերական ուժերի ավիացիոն խումբը, անօդաչու սարքերի հարձակմանն է ենթարկվել։ Ռազմական թղթակից Օլեգ Բլոխինը հայտնել է, որ բազայում մարտական պատրաստության մասին հայտարարվել է տեղի ժամանակով ժամը 2:30-ին։ «Դա որակվել է որպես «ցամաքային թշնամու հարձակում»: Գրեթե անմիջապես աշխատել է «Պանցիրը»։ Կրակոցներ ու պայթյուններ են լսվել»,- գրել է Բլոխինը։ Մեկ ժամ անց կրակոցները գործնականում դադարել են, բայց երկար ժամանակ տագնապը չէր չեղարկվել։ Հարձակման մասին հայտնել են նաեւ «ВЧК-ОГПУ»-ն եւ եւ Astra-ն, սակայն առանց մանրամասների։ Պաշտոնական հաստատում հրապարակման պահին չի եղել նաեւ ՌԴ ՊՆ-ից։ «Միջադեպը եւս մեկ անգամ ապացուցում է, որ Սիրիայում մեր բազաներին թույլ չեն տա նորմալ աշխատել»,- նշել է Բլոխինը։ Նա պարզաբանել է, որ «սադրանքի» հետեւում կարող է կանգնած լինել «Հայաթ Թահրիր ալ-Շամ» խմբավորումը, որի ներկայացուցիչները տապալեցին Բաշար Ասադի ռեժիմը եւ իրենց ձեռքը վերցրին իշխանությունը երկրում։ Այն բանից հետո, երբ Ասադը փախավ Ռուսաստան, Մոսկվան փորձում է բանակցել Սիրիայի նոր իշխանությունների հետ «Հմեյմիմ» ավիաբազայում եւ Տարտուսում ռազմածովային բազայում ռազմական ներկայությունը պահպանելու շուրջ։ Փետրվարի 12-ին Ռուսաստանի նախագահ Վլադիմիր Պուտինը եւ Սիրիայի ժամանակավոր նախագահ Ահմեդ ալ-Շարաան առաջին հեռախոսազրույցն են ունեցել։ Պուտինը հաստատել է Ռուսաստանի «մշտական պատրաստակամությունը՝ օգնելու բարելավել Սիրիայում սոցիալ-տնտեսական իրավիճակը»։ Դրանից երկու օր անց հարյուր միլիարդավոր սիրիական ֆունտ տեղափոխող ինքնաթիռը վայրէջք է կատարել Դամասկոսի օդանավակայանում։ Ըստ Reuters-ի՝ նա եկել է Ռուսաստանից, որն Ասադի օրոք Սիրիայի համար փող էր տպում։ Գործակալության աղբյուրներն ուղիղ չեն նշել կանխիկ գումարի ուղարկման պատճառը, բայց դա կարող է լինել սիրիական նոր ռեժիմին այս կերպ ֆինանսական օգնություն ցուցաբերելու Կրեմլի փորձը։
