Հայաստանի Հանրապետության կրթության, գիտության, մշակույթի և սպորտի նախարար Ժաննա Անդրեասյանն աշխատանքային այց է կատարել Արմավիրի մարզի և Երևանի կառուցվող և վերակառուցվող մարզադպրոցներ։
Նախարարին ուղեկցել է ԿԳՄՍ նախարարի տեղակալ Հասմիկ Ավագյանը։
Ինչպես տեղեկացնում է ԿԳՄՍ նախարարության տարածած հաղորդագրությունը, առաջին կանգառը Արմավիր համայնքի Մյասնիկյան գյուղն էր, որտեղ պետության ֆինանսավորմամբ ընթանում է նոր մարզադպրոցի շինարարությունը։
Նախարարը տեղում հետևել է աշխատանքների ընթացքին, ծանոթացել և հետաքրքրվել իրականացվող աշխատանքների տեմպերով: Նշվել է՝ Մյասնիկյանում առաջին անգամ է մարզադպրոց կառուցվում, և այն որպես սպորտային ենթակառուցվածք կծառայի նաև դպրոցին:
Ժաննա Անդրեասյանը կարևորել է մարզադպրոցում դասավանդվող մարզաձևերի հստակեցման հարցն՝ ընդգծելով համապատասխան մասնագետների ներգրավման կարևորությունը։
Նախարարի հաջորդ կանգառը Փարաքար համայնքն էր, որտեղ ևս կառուցվում է նոր մարզադպրոց։ Շինարարությունն իրականացվում է պետական բյուջեի միջոցներով՝ Տարածքային զարգացման հիմնադրամի պատվերով։
Փարաքարի նոր մարզադպրոցի ընդհանուր մակերեսը մոտ 3000 քմ է, այն նախատեսված է մի քանի մարզաձևերի համար՝ բռնցքամարտ, ծանրամարտ, ըմբշամարտ և սեղանի թենիս։ Շենքը երկհարկանի է՝ կիսանկուղային և վերգետնյա մեկ հարկով, և կառուցվում է գործող մարզադպրոցի հարևանությամբ, որն այսօր ունի ավելի քան 130 սան։
Արձանագրվել է, որ նոր մարզադպրոցի կառուցումն արդեն իսկ նպաստել է համայնքում սպորտի նկատմամբ հետաքրքրության աճին։
ԿԳՄՍ նախարարը վստահություն է հայտնել, որ ստեղծվող ժամանակակից պայմանները կնպաստեն երեխաների ավելի լայն ներգրավվածությանը և մարզական ձեռքբերումների աճին։
Ժաննա Անդրեասյանն ու նախարարի տեղակալ Հասմիկ Ավագյանն այցելել են նաև Հեծանվային սպորտի և Հրանտ Շահինյանի անվան սպորտային, գեղարվեստական մարմնամարզության և ակրոբատիկայի օլիմպիական մանկապատանեկան մարզադպրոց, որտեղ շարունակվում են լայնածավալ վերակառուցման աշխատանքները։
Կառուցվել է երկու մասնաշենք, ինչպես նաև հեծանվուղի՝ 220 մետր պարագծով և 2 մետր լայնությամբ։ Ներկայում ավարտված են հիմնական շինարարական աշխատանքները, իրականացվել են ներքին հարդարման, ինչպես նաև միջսենյակային պատերի կառուցման աշխատանքները, ձևավորվել են հանդերձարանները, լոգարանները և վարչական տարածքները։
Մարզադպրոցների վերակառուցման և բարեկարգման ծրագիրն իրականացվում է պետական հատկացումներով․ նախատեսվում է մարզադպրոցը շահագործման հանձնել արդեն այս տարի։
Ծրագիրը ներառում է նաև 1727 քմ տարածքի բարեկարգում. գեղարվեստական մարմնամարզության և ակրոբատիկայի մասնաշենքի մակերեսը կազմում է 1424 քմ․ նորակառույց համալիրն ունի մարզադահլիճ՝ 250 նստատեղով, հանդերձարաններ, սանհանգույցներ, ճաշարան, պարի հարթակ, վարչական և օժանդակ տարածքներ։ Նախատեսված է նաև բազմաֆունկցիոնալ հարթակ, որը կարող է ծառայել որպես գեղարվեստական մարմնամարզության թանգարան, իսկ մրցումների ժամանակ՝ որպես դիտահարթակ հյուրերի համար։
Հեծանվային մարզադպրոցի երկհարկանի մասնաշենքի մակերեսը կազմում է 1280 քմ։ Առաջին հարկում նախատեսված են 70-90 մարզիկների համար նախատեսված 9 խմբասենյակ՝ անմիջական ելքերով դեպի հեծանվուղի, ինչպես նաև հանդերձարաններ, սանհանգույցներ, ֆիզիկական պատրաստության դահլիճ և վարչական սենյակներ։ Երկրորդ հարկում կգործի հեծանվասպորտի թանգարան:
Այցի ընթացքում նախարարը կարևորել է աշխատանքների պատշաճ իրականացումն ու սահմանված ժամկետների պահպանումը։
