Ջրային կոմիտեի նախագահ Արամազդ Ղալամքարյանը մարտի 2-ին հյուրընկալել է Համաշխարհային բանկի (ՀԲ) պատվիրակությանը՝ ՀԲ հայաստանյան գրասենյակի ղեկավար Ֆաբրիցիո Ձարկոնեի գլխավորությամբ։
Ինչպես տեղեկացնում է Ջրային կոմիտեի տարածած հաղորդագրությունը, հանդիպման ընթացքում անդրադարձ է կատարվել «Հայաստանի ջրի և ոռոգման ծառայությունների բարելավման ծրագրին», որն անցյալ շաբաթ քննարկվել էր Ազգային ժողովի Ֆինանսավարկային և բյուջետային հարցերի մշտական հանձնաժողովում։
Ծրագիրը համաֆինանսավորվելու է Համաշխարհային բանկի և Զարգացման ֆրանսիական գործակալության կողմից, իսկ միջոցներն ուղղվելու են ջրային ոլորտի բարեփոխմանը և ինստիտուցիոնալ կարողությունների զարգացմանը, ջրամատակարարման և ջրահեռացման համակարգերի արդիականացմանը, հատկապես՝ գյուղական բնակավայրերում, ինչպես նաև ոռոգման ենթակառուցվածքների և համակարգերի կառավարման լավարկմանը։
Կողմերը քննարկել են նաև Ջրային հռչակագրի (Water Compact) մշակման և Համաշխարհային բանկի նախագահի հետ համատեղ ստորագրման հետ կապված կազմակերպչական հարցեր։
Կոմիտեի նախագահը շնորհակալություն է հայտնել Համաշխարհային բանկի ներկայացուցիչներին՝ արդյունավետ համագործակցության համար։
