Իսրայելի դեմ պատերազմի ժամանակ Իրանը պատրաստվում էր ականապատել Հորմուզի նեղուցը, գրում է Reuters-ը։
Անցյալ ամիս Իրանի զինված ուժերը Պարսից ծոցում գտնվող նավերի վրա ռազմածովային ականներ են դրել, ինչը սրել է Վաշինգտոնի մտավախությունները, որ Թեհրանը պատրաստվում է փակել Հորմուզի նեղուցը՝ Իսրայելի կողմից Իրանի տարբեր թիրախների վրա հարվածներից հետո, հայտնել են երկու ամերիկացի պաշտոնյաներ։
Նեղուցում այդպես էլ չտեղադրված ականների բեռնումը ենթադրում է, որ Թեհրանը, հնարավոր է, լուրջ էր տրամադրված աշխարհի ամենածանրաբեռնված նավագնացության ուղիներից մեկը փակելու հարցում։
Աշխարհի նավթի և գազի մատակարարումների մոտ մեկ հինգերորդն անցնում է Հորմուզի նեղուցով և դրա փակումը, հավանաբար, կհանգեցներ համաշխարհային էներգակիրների գների կտրուկ աճի։
Փոխարենը, նավթի համաշխարհային գները ավելի քան 10%-ով անկում ապրեցին Իրանի միջուկային օբյեկտներին ԱՄՆ-ի հարվածներից հետո, մասամբ պայմանավորված այն բանով, որ հակամարտությունը էական խափանումներ չի առաջացրել նավթի առևտրում։
Հունիսի 22-ին՝ Թեհրանի միջուկային ծրագիրը խափանելու փորձի շրջանակներում ԱՄՆ-ի կողմից Իրանի երեք կարևոր միջուկային օբյեկտների ռմբակոծությունից կարճ ժամանակ անց, Իրանի խորհրդարանը, ըստ լուրերի, հավանություն է տվել նեղուցը փակելու վերաբերյալ հարցին։
Որոշումը պարտադիր բնույթ չի կրել և փակման վերաբերյալ վերջնական որոշումը պետք է կայացներ Իրանի Ազգային անվտանգության բարձրագույն խորհուրդը, այդ ժամանակ հայտնել է Իրանի Press TV-ն։
Իրանի նախապատրաստական աշխատանքների վերաբերյալ մեկնաբանություններ տալուց հետո Սպիտակ տան խոսնակը պատասխանել է՝ «Նախագահի կողմից գործողության փայլուն կառավարման, հուսիթների դեմ հաջող արշավի և առավելագույն ճնշման արշավի շնորհիվ Հորմուզի նեղուցը մնում է բաց, նավարկության ազատությունը վերականգնվել է և Իրանը զգալիորեն թուլացել է»։
Երկու պաշտոնյաներն էլ ասել են, որ ԱՄՆ կառավարությունը չի բացառել այն հնարավորությունը, որ ականների բեռնումը խորամանկություն է եղել: Հնարավոր է՝ իրանցիները պատրաստել են ականները՝ Վաշինգտոնին համոզելու համար, որ Թեհրանը լուրջ է տրամադրված նեղուցը փակելու հարցում, բայց նրանք դա անելու մտադրություն չեն ունեցել, ասել են պաշտոնյաները:
Իրանի զինվորականները կարող են պարզապես անհրաժեշտ նախապատրաստություններ կատարել այն դեպքում, եթե Իրանի ղեկավարությունը նման հրաման տա։
