ԱՄՆ նորընտիր նախագահ Դոնալդ Թրամփի պաշտոնավարումից հետո ԱՄՆ-ը կփորձի ամրապնդել հարաբերություններն աֆրիկյան երկրների հետ։ Այս մասին գրել է Jeune Afrique ամսագիրը՝ հղում կատարելով Աֆրիկայի գծով փորձագետներին, որոնք աշխատել են նախկին հանրապետական վարչակազմում։
Փորձագետները նման եզրակացության են եկել՝ հիմնվելով Թրամփի առաջին նախագահական ժամկետի ընթացքում Աֆրիկայում ԱՄՆ քաղաքականության վերլուծության վրա: Մասնավորապես, այն ժամանակ ԱՄՆ նախագահը բանակցություններ էր սկսել Քենիայի հետ ազատ առեւտրի համաձայնագրի շուրջ։ Բացի այդ, հանրապետականը հիմնել էր «Պրոսպեր Աֆրիկա» կազմակերպությունը, որը միավորում էր 17 պետական կառույցներ՝ առեւտրային կապերն ամրապնդելու համար։ Թրամփը նաեւ ստեղծել է ԱՄՆ Միջազգային զարգացման ֆինանսական կորպորացիան, որը հինգ տարվա ընթացքում մայրցամաքում ներդրել է ավելի քան 10 մլրդ դոլար:
ԱՄՆ գործող նախագահ Ջո Բայդենի Աֆրիկայի հարցերով նախկին հատուկ օգնական Ջադ Դեւերմոնթի խոսքերով՝ Միացյալ Նահանգների շահերից է բխում Աֆրիկայում ծրագրերի իրականացումը, քանի որ կարեւոր հանքանյութերը եւ իր ներկայությունը մեծացնելու հեռանկարներն կան այս կարեւոր տարածաշրջանում։ Սակայն ամսագիրը նշել է, որ Աֆրիկան մտահոգված է Թրամփի ապագա առեւտրային քաղաքականությամբ։ Մասնավորապես, աֆրիկացի քաղաքական գործիչները մտահոգված են Չինաստանից ապրանքների վրա մաքսատուրքեր սահմանելու հնարավորությամբ, ինչը կարող է վնասել Աֆրիկայից արտահանմանը, քանի որ որոշ ապրանքներ, օրինակ՝ տեքստիլը, պատրաստվում են չինական հումքից, նշել է պարբերականը։
Թրամփի երդմնակալությունը տեղի կունենա 2025թ. հունվարի 20-ին։ Նա ծրագրում է լրացուցիչ մաքսատուրքեր սահմանել Ամերիկայի խոշոր առեւտրային գործընկերների վրա։ Մասնավորապես, Թրամփը հայտարարել է, որ Չինաստանից բոլոր ապրանքների համար լրացուցիչ մաքսատուրքեր կսահմանի 10 տոկոսի չափով, քանի որ իբր Չինաստանից ԱՄՆ թմրանյութերի մաքսանենգությունը մեծ չափերի է։
