Վաշինգտոնի վարչակազմի հեռացող ղեկավար Ջո Բայդենը կարծում է, որ Միացյալ Նահանգները պետք է փոխի սահմանադրությունը, որը թույլ կտա պատժել օրինախախտ նախագահներին եւ պետության նախկին ղեկավարներին։
«Մենք պետք է փոխենք սահմանադրությունը, որպեսզի պարզ հասկացնենք, որ ոչ մի նախագահ իմունիտետ չունի այն հանցագործություններից, որոնք կատարել է պաշտոնավարման ընթացքում»,- չորեքշաբթի երեկոյան ասել է Բայդենը համաքաղաքացիներին ուղղված հրաժեշտի հեռուստաուղերձում։ Նա հունվարի 20-ին հանձնելու է նախագահի պաշտոնը Դոնալդ Թրամփին։ Գործող նախագահի խոսքով՝ ԱՄՆ-ում նախագահական իշխանությունը «բացարձակ չէ եւ չպետք է լինի»։
Դեմոկրատ Բայդենը հաղթել է հանրապետական Թրամփին 2020թ. ընտրություններում։ Վերջինս ձգտում էր վերընտրվել ԱՄՆ նախագահի պաշտոնում։ Թրամփը վիճարկել է քվեարկության արդյունքները։ Հանրապետականի կողմնակիցները, որոնք 2021թ. հունվարի 6-ին հավաքվել էին Վաշինգտոնում՝ ի պաշտպանություն նրա բազմահազարանոց ցույցում, ներխուժել են Կոնգրես՝ փորձելով խանգարել ընտրությունների արդյունքների հաստատմանը։
Կոնգրեսի դեմոկրատներն այնուհետեւ Թրամփին մեղադրել են խռովություն հրահրելու մեջ: Հանրապետական կուսակցության որոշ ներկայացուցիչներ նույն կերպ են արտահայտվել։ Կապիտոլիումի բլրի դեմոկրատները, որոնք մեծամասնություն ունեին Ներկայացուցիչների պալատում, դրանից հետո ձեռնարկել են Թրամփին իմփիչմենթի ենթարկելու երկրորդ փորձը, որն այդ ժամանակ արդեն պետության ղեկավարի լիազորությունները փոխանցել էր Բայդենին։ Հանրապետականների կողմից վերահսկվող Սենատն արդարացրել է Թրամփին։
Բացի այդ, հատուկ դատախազ Ջեք Սմիթը, որը Բայդենի օրոք նշանակվել է հունվարի 6-ի իրադարձությունները հետաքննելու համար, 2023թ. մեղադրանք է առաջադրել Թրամփին չորս հոդվածներով։ Նրան փաստացի մեղադրում էին անօրինական գործողություններով իշխանությունը պահպանելու փորձի մեջ։ Այնուամենայնիվ, ԱՄՆ Գերագույն դատարանը 2024թ. ամռանը ճանաչել է Թրամփի մասնակի անձեռնմխելիությունը դատական հետապնդումից։ 2024թ. նոյեմբերին ընտրություններում հաղթանակից հետո Սմիթը միջնորդություն է ներկայացրել Թրամփի գործը կարճելու մասին, քանի որ, ըստ ԱՄՆ պրակտիկայի, գործող նախագահը անձեռնմխելի է ինչպես վարչական, այնպես էլ քրեական հետապնդումից՝ պաշտոնական կարգով ընդունված որոշումների համար: Դատավոր Տանյա Չաթկենը, որը նախագահում էր դատավարությունը, բավարարել է Սմիթի խնդրանքը:
