ԱՄՆ պաշտպանության նախարարությունը Զինված ուժերի կենտրոնական հրամանատարության (CENTCOM) պատասխանատվության գոտի է տեղափոխում ավիակիր հարվածային խումբը՝ «Կառլ Վինսոն» ավիակրի գլխավորությամբ: Այս մասին հայտնել է Պենտագոնի պաշտոնական ներկայացուցիչ Շոն Փառնելը։
«Հնդկախաղաղօվկիանոսյան տարածաշրջանում պլանային զորավարժությունների ավարտից հետո ավիակիր հարվածային խումբը՝ «Կառլ Վինսոն» ավիակրի գլխավորությամբ, կժամանի CENTCOM-ի գոտի՝ շարունակելու աջակցությունը տարածաշրջանային կայունությանը, ագրեսիայի զսպմանը և տարածաշրջանային առևտրային ուղիների պաշտպանությանը», - ասվում է Փառնելի հայտարարության մեջ:
Նա նշել է, որ այդ խնդիրները կատարելու և «ուժի օգնությամբ խաղաղության հասնելու նախագահի ցուցումներին համապատասխան», պաշտպանության նախարարի հրամանով տարածաշրջանում է մնում ավիակիր հարվածային խումբը՝ «Հարի Թրուման» ավիակրի գլխավորությամբ։
CENTCOM-ի պատասխանատվության գոտու մեջ մտնում են Մերձավոր Արևելքը, Արևելյան Աֆրիկան և Կենտրոնական Ասիան:
Միացյալ Նահանգներն «առաջվա պես հավատարիմ է մնում տարածաշրջանային անվտանգությանը Կենտրոնական հրամանատարության գոտում և պատրաստ է արձագանքել ցանկացած պետական կամ ոչ պետական սուբյեկտի գործողություններին, որը ձգտում է ընդլայնել կամ սաստկացնել հակամարտությունը տարածաշրջանում», - հայտարարել է Փառնելը:
Նա ընդգծել է, որ պաշտպանության նախարար Փիթ Հեգսեթը «հստակ հայտարարում է, որ եթե Իրանը կամ նրա պրոքսիները սպառնան ամերիկյան անձնակազմին և տարածաշրջանային շահերին, ապա Միացյալ Նահանգները վճռական գործողություններ կձեռնարկի իր քաղաքացիներին պաշտպանելու համար»:
