Սպիտակ տան մամուլի խոսնակ Քերոլայն Լևիթը հայտարարել է, որ ԱՄՆ նախագահ Դոնալդ Թրամփը պաշտպանում է երկրի սահմանները և այժմ որևէ անօրինական մուտք երկիր տեղի չի ունենում։ Այս մասին նա ասել է ճեպազրույցի ժամանակ, որը տարածել է Fox News-ը։
«Մենք ուսումնասիրում ենք արդեն իսկ երկրի ներսում գտնվողներին և արտաքսում ենք նրանց, ովքեր անօրինական են հայտնվել երկրում, ինչպես նաև ուսումնասիրում ենք վիզաները», - նշել է Լևիթը։
ԱՄՆ վիզաներն անվանելով «արտոնություն, այլ ոչ թե իրավունք»՝ Լևիթը պնդել է, որ Պետքարտուղարությունը լիազորություն ունի արտաքսելու բոլոր նրանց, ովքեր կհամարվեն, որ հակասում են ԱՄՆ ազգային շահերին։
«Ամերիկան չի կարող շարունակել ընդունել այն փախստականներին, ովքեր հետագայում շահագործում են այն համակարգը, որում նրանք ընդունվել են: Ես ձեզ կասեմ, որ մեր ազգի բնույթին և ամբողջականությանը չեն նպաստում այն փախստականները, որոնք այստեղ են գալիս ապաստանի ենթադրյալ դժվարին իրավիճակում և փախչում են հալածանքներից, ապա գալիս են Միացյալ Նահանգներ՝ չարաշահելու մեր համակարգը և խաբելու ամերիկացի հարկատուներին», - նշել է Լևիթը։
«Նախորդ շաբաթվա վայրագությունից հետո ավելի քան երբևէ կարևոր է ավարտել նախագահի զանգվածային արտաքսման գործողությունը», - նշել է նա՝ հավելելով, որ Վաշինգտոնը չի կարող թույլ տալ, որ միլիոնավոր անօրինական ներգաղթյալներ, որոնք խախտել են ԱՄՆ-ի օրենքները երկիր մտնելու համար, արժանանան համաներման այն բանից հետո, երբ խախտել են ամերիկյան օրենքները:
Լևիթի խոսքով՝ այդ ներգաղթյալները պետք է վերադառնան իրենց հայրենիք:
Այս առնչությամբ X-ում կատարած գրառման մեջ նա նշել է, որ առաջնորդները պարտավոր են պաշտպանել և առաջ մղել իրենց սեփական ժողովրդի, ոչ թե օտարերկրյա քաղաքացիների շահերը։
«Ահա թե ինչու նախագահ Թրամփն ավելի քան երբևէ հանձնառու է ամերիկյան ինքնիշխանության լիարժեք վերականգնմանը՝ մեր սահմանները անվտանգ պահելով, բոլոր անօրինական օտարերկրացի ներխուժողներին հեռացնելով և վերակառուցելով օրինական ներգաղթի համակարգը», - նշել է նա գրառման մեջ։
Լևիթի խոսքով՝ նախորդ շաբաթ Վաշինգտոնում իրականացված կրակոցները, որոնց հետևանքով Ազգային գվարդիայի մեկ զինվոր զոհվել է, իսկ մյուսը՝ ծանր վիրավորվել, նախկին նախագահ Ջո Բայդենի վարչակազմի կողմից Աֆղանստանից ԱՄՆ զորքերի դուրսբերման հետևանքն էր։
