Իրանի ԱԳ նախարար Հոսեյն Ամիր Աբդոլլահիանը ժամանել է Նյու Յորք՝ մասնակցելու Պաղեստինի հարցով ՄԱԿ-ի Անվտանգության խորհրդի նիստին և խորհրդակցություններ անցկացնելու միջազգային պաշտոնյաների հետ։
Իրանի դիվանագիտության ղեկավարը նախատեսում է հանդիպել համաշխարհային կազմակերպության գլխավոր քարտուղար Անտոնիո Գուտերեշի հետ, ինչպես նաև բանակցություններ վարել Իսլամական համագործակցության կազմակերպության անդամ երկրների ՄԱԿ-ում մշտական ներկայացուցիչների հետ, հայտնում է հանրապետության ԱԳՆ-ն։ Աբդոլլահիանն ունի նաև մի քանի երկկողմ հանդիպումներ և մամուլի ասուլիս։
