Անընդունելի եմ համարում ցանկացած սոցիալական շերտավորում, որը կարող է առնչություն ունենալ նաեւ սահմանադրական պարտավորությունների հետ։ Այս մասին մայիսի 29-ին լրագրողների հետ զրույցում ասել է Հայաստանի օմբուդսմեն Անահիտ Մանասյանը։Նա անընդունելի է համարել այնպիսի իրավական մեխանիզմների ստեղծումը, որոնք կարող են տպավորություն ստեղծել, թե պարտավորության կատարման առումով արտոնությունը կարող է պայմանավորված լինել անձի ֆինանսական վիճակով, ֆինանսական ռեսուրսների առկայությամբ կամ բացակայությամբ։«Բացի այդ, բանակում մեծ տարածում են գտել ոչ կանոնադրական հարաբերությունները, եւ այդ միտման խորացման ռիսկերը չեն գնահատվել»,- նշել է Մանասյանը։ Նա նշել է, որ օրինագիծն իր հետ նախապես չի քննարկվել եւ չի ուղարկվել Մարդու իրավունքների պաշտպանի գրասենյակ։«Եթե օրինագիծն ընդունվի, Մարդու իրավունքների պաշտպանի գրասենյակն իրավասու է դիմել Սահմանադրական դատարան, հետեւաբար ես կարող եմ դիմել Սահմանադրական դատարան»,- ընդգծել է օմբուդսմենը։ Նա վստահեցրել է, որ գործադիր իշխանության կողմից որեւէ միջամտություն չի զգացել իր աշխատանքում։ «Բազմաթիվ օրինակներ կան, երբ մենք դիմել ենք Սահմանադրական դատարան՝ կառավարության կողմից դրական եզրակացություն ստացած նախագծերի առնչությամբ»,- վստահեցրել է Մանասյանը։Հիշեցնենք, որ իշխող «Քաղաքացիական պայմանագիր» խմբակցության պատգամավոր Հայկ Սարգսյանը օրինագիծ է ներկայացրել, որով առաջարկում է գումարի դիմաց զինվորական ծառայության ժամկետը կրճատել 1 կամ 4 ամսով։ Նախագծով զինծառայությունից խուսափողները հնարավորություն կունենան ազատվել պատասխանատվությունից՝ այն լրացնելով կամ կրճատված ժամկետը կրելով եւ համապատասխան գումարները պետական բյուջե մուտքագրելով։ Պաշտպանության նախարարությունը որոշակի առաջարկություններ է արել, որոնց համաձայն՝ ժամկետային զինծառայողը կարող է վճարել 18 միլիոն դրամ եւ ծառայել 4 ամիս կամ վճարել 24 միլիոն դրամ եւ ծառայել 1 ամիս։ Բացի այդ, առաջարկվում է մինչեւ 18 տարին լրանալը քաղաքացիությունից հրաժարվելու համար սահմանել պարտադիր տուրք՝ 15 մլն դրամ։ Փաթեթը դրական եզրակացություն է ստացել կառավարությունից, սակայն խորհրդարանական համապատասխան հանձնաժողովը հասարակության մեջ հնչող քննադատությունների պայմաններում անսպասելիորեն անորոշ ժամանակով հետաձգել է քննարկումը։ Փոփոխությունները նախկինում քննադատել էր նաեւ Հայաստանի մարդու իրավունքների պաշտպան Անահիտ Մանասյանը։
