Գրադարանավարի օրվա կապակցությամբ Հայաստանի կրթության, գիտության, մշակույթի և սպորտի նախարար Ժաննա Անդրեասյանը ոլորտի մի խումբ ներկայացուցիչների պարգևատրել է ԿԳՄՍՆ մեդալով, պատվոգրերով ու շնորհակալագրերով։
Գերատեսչության տարածած հաղորդագրության մեջ նշվում է, որ նախարարը շնորհակալություն է հայտնել երկարամյա բարեխիղճ ու շնորհակալ աշխատանքի համար՝ ընդգծելով նրանց ավանդը գրադարանային գործի զարգացման և ընթերցանության խթանման ուղղությամբ։
Ժաննա Անդրեասյանի նշմամբ՝ Կառավարության նոր ծրագրում ընթերցանության խրախուսումն առաջնահերթություն է․ իրականացվելու են բազմաթիվ նոր ծրագրեր՝ միտված հանրության շրջանում ընթերցանության մակարդակի բարձրացմանը։
Նա անդրադարձել է նաև 15 տարեկան դպրոցականների շրջանում անցկացված միջազգային հետազոտության արդյունքներին՝ շեշտելով, որ ուսումնական հաստատությունների անելիքներին զուգահեռ շատ կարևոր է նաև գրադարանների դերը:
«Գրադարանները իսկապես պետք է համայնքային կենտրոններ լինեն և դառնան բոլոր տարիքի մեր քաղաքացիներ համար ամենահաճախ այցելվող վայրերից մեկը: Ընթերցանությունը շատ ավելի խորը արմատներ է ձգում այնտեղ, որտեղ այն ուղեկցվում է կարդացած նյութի քննարկմամբ, կարծիքների փոխանակմամբ: Գրադարաններն այն տարածքներն են, որտեղ պետք է տեղի ունենան ընթերցումներ ու քննարկումներ․ այստեղ գրադարանավարներն ունեն շատ կարևոր անելիք՝ հուշելու հետաքրքրող թեմաների շրջանակում՝ ինչ գրականություն ընթերցել: Անչափ կարևորում են նաև գրադարանների և կրթական հաստատությունների սերտ համագործակցությունը և ուրախ եմ, որ որոշ գրադարաններ այս ուղղությամբ ակտիվ աշխատում են»,- նշել է նախարարը:
Ժաննա Անդրեասյանը կարևորել է նաև գրադարանավարների շարունակական վերապատրասումները և հավելել, որ նախընթաց շրջանում արդեն իրականացվել են բազմաթիվ վերապատրաստումներ, այդ թվում՝ միջազգային գործընկերների աջակցությամբ․ նմանօրինակ նախաձեռնությունները կլինեն շարունակական։
Ընդգծելով, որ 2026-2027 ուսումնական տարին նախարարությունը հայտարարել է «Ընթերցանության տարի»՝ Ժաննա Անդրեասյանն հորդորել է գրադարանային ոլորտի աշխատակիցներին լինել առավել նախաձեռնող կրթական հաստատություններին օժանդակելու, համատեղ նախաձեռնություններ և ծրագրեր իրականացնելու գործում:
Հանդիպման ընթացքում նախարարը գրադարանային ոլորտի ներկայացուցիչների հետ քննարկել է նաև առաջիկայում մեկնարկող ատեստավորման գործընթացին վերաբերող մի շարք հարցեր. «Կառավարության ծրագրով գրադարանավարների աշխատավարձերի բարձրացում է նախատեսվում: Գործառույթները, աշխատանքի հանդեպ պահանջները տարբեր են, ուստի կառանձնացվեն մասնագիտական համապատասխան խմբեր և յուրաքանչյուր խմբի համար՝ ըստ պաշտոնի և պարտականությունների նկարագրի, կկազմակերպվի ատեստավորում, որը կապահովի նաև վարձատրության նկատելի բարձրացում»,- նշել է նախարարը և հավելել, որ ատեստավորման գործընթացը կնպաստի գրադարանային ոլորտի աշխատակիցների սոցիալական երաշխիքների ամրապնդմանը, ինչպես նաև ոլորտում երիտասարդ կադրերի ներգրավմանը:
